മോദി സര്‍ക്കാരിനെതിരെ വിമര്‍ശനവുമായി ഇ.ടി മുഹമ്മദ് ബഷീര്‍ എം.പി
ന്യൂഡല്‍ഹി: മോദി സര്‍ക്കാരിനെതിരെ ആഞ്ഞടിച്ച് മുസ്‌ലിം ലീഗ് നേതാവ് ഇ.ടി മുഹമ്മദ് ബഷീര്‍ എം.പി. മോദി സര്‍ക്കാരിനെ സ്തുതിക്കുന്നത് ഐസ് കട്ടയില്‍ പെയിന്റടിക്കുന്നത് പോലെയെന്ന് ഇ.ടി പറഞ്ഞു.
സത്യത്തിനും ഇന്ത്യയിലെ യാഥാര്‍ഥ്യങ്ങള്‍ക്കും ഘടകവിരുദ്ധമായ പ്രസംഗമാണ് സംയുക്ത പാര്‍ലമെന്റ് സമ്മേളനത്തില്‍ രാഷ്ട്രപതി നടത്തിയത്. മഹത്തായ രാജ്യത്തിന് വലിയ കേടുപാടുകള്‍ ഏല്‍പ്പിക്കുകയാണ് കേന്ദ്ര സര്‍ക്കാര്‍ ചെയ്തതെന്നും ഇ.ടി കുറ്റപ്പെടുത്തി.
ബി.ജെ.പിയുടെ തകര്‍ച്ചയുടെ വലിയ ഉദാഹരണമാണ് ഫൈസാബാദ്. ബാബരി മസ്ജിത് തകര്‍ത്ത് രാമക്ഷേത്രം നിര്‍മിച്ച അയോധ്യ ഉള്‍പ്പെടുന്ന ഫൈസാബാദില്‍ ബി.ജെ.പി തകര്‍ന്നടിഞ്ഞത് ഉദാത്തമായ മാതൃകയാണ്. അയോധ്യയിലെ ഹിന്ദു സഹോദരന്മാര്‍ പോലും ബി.ജെ.പിയെ ഇഷ്ടപ്പെടുന്നില്ല.വലിയ രാഷ്ട്രീയ മാറ്റത്തിനാണ് 2024ലെ ലോക്‌സഭ തെരഞ്ഞെടുപ്പ് സാക്ഷ്യം വഹിച്ചത്. പ്രധാനമന്ത്രിക്കും ബി.ജെ.പിക്കും വലിയ ഇടിവാണ് സംഭവിച്ചത്. എന്നാല്‍, രാഹുല്‍ ഗാന്ധിയുടെ നേതൃത്വത്തില്‍ കരുത്തുറ്റ ഒരു പ്രതിപക്ഷത്തെ കാണാമെന്നും ഇ.ടി ചൂണ്ടിക്കാട്ടി.