തിരുവനന്തപുരത്ത് കാറിനുള്ളിൽ കഴുത്തറുത്ത നിലയിൽ മൃതദേഹം

തിരുവനന്തപുരം: കളിയിക്കാവിളയിൽ കാറിനുള്ളിൽ കഴുത്തറുത്ത നിലയിൽ യുവാവിന്റെ മൃതദേഹം. മലയൻകീഴ് സ്വദേശി ദീപുവാണു മരിച്ചതെന്നു പൊലീസ് പറഞ്ഞു. കാറിന്റെ ഡിക്കി തുറന്നു കിടക്കുകയായിരുന്നു. രാത്രി 11 .45 ന് രാത്രി പെട്രോളിങ്ങിനിടെ തമിഴ്‌നാട് പൊലീസാണ് മൃതദേഹം കണ്ടത്. കഴുത്ത് 70 ശതമാനവും അറുത്തനിലയിലാണ്. ഇയാൾക്കു തിരുവനന്തപുരം മലയത്ത് ക്രഷർ യൂണിറ്റുണ്ട്.

പുതിയ ക്രഷർ തുടങ്ങുന്നതിനായി ജെസിബിയും മറ്റും വാങ്ങുന്നതിനു 10 ലക്ഷം രൂപയുമായി കോയമ്പത്തൂരിലേക്ക് പോയതാണെന്നാണു വീട്ടുകാരുടെ മൊഴി. മോഷണ ശ്രമത്തിനിടെയുള്ള കൊലപാതകമാവാം എന്നാണ് പൊലീസ് സംശയിക്കുന്നത്. ദീപുവിന്റെ മൃതദേഹം കുഴിത്തറ ജനറൽ ആശുപത്രിയിലേക്ക് മാറ്റി.