മാതാപിതാക്കൾക്കൊപ്പം നടന്നുപോവുകയായിരുന്ന പെൺകുട്ടിക്കുനേരെ യുവാവിന്റെ അതിക്രമം

ചങ്ങനാശേരി: മാതാപിതാക്കൾക്കൊപ്പം നടന്നുപോവുകയായിരുന്ന പെൺകുട്ടിക്കു നേരെ നഗരമധ്യത്തിൽ യുവാവിന്റെ‌‌ അതിക്രമം. കഴിഞ്ഞ ദിവസം രാത്രി 9:15 നു ചങ്ങനാശേരി നഗരമധ്യത്തിൽ മുനിസിപ്പൽ ആർക്കേഡിനു മുന്നിലാണു സംഭവം നടന്നത്. ആക്രമണം തടയാൻ ശ്രമിച്ച വ്യാപാരികൾക്കും ഓട്ടോക്കാർക്കും നേരെ യുവാവിന്റെ സുഹൃത്തുക്കൾ മുളകുസ്പ്രേ പ്രയോഗിച്ചുവെന്നും പരാതിയുണ്ട്. സ്റ്റേഷനിൽ വിവരമറിയിച്ചിട്ടും പൊലീസെത്തിയത് അരമണിക്കൂറിനു ശേഷമാണെന്നുമുള്ള ആക്ഷേപം പുറത്തുവരുന്നുണ്ട്.

സ്പ്രേ പ്രയോഗിച്ചവരെ നാട്ടുകാർ പിന്നീടു കീഴ്പ്പെടുത്തി പൊലീസിനു കൈമാറി. പക്ഷെ പെൺകുട്ടിയെ ആക്രമിച്ച യുവാവിനെ ഇതുവരെ പിടികൂടാനായില്ല. പ്രധാന റോഡിലൂടെ അച്ഛനും അമ്മയ്ക്കുമൊപ്പം നടന്നുപോയ പെൺകുട്ടിയെ യുവാവ് ആക്രമിക്കുകയായിരുന്നു. സമീപത്തെ വ്യാപാരികളും ഓട്ടോഡ്രൈവർമാരും യുവാവിനെ തട‍ഞ്ഞുവച്ച് പൊലീസ് സ്റ്റേഷനിൽ വിവരമറിയിച്ചിരുന്നു. ഈ സമയം റോഡിലൂടെ നടന്നുവന്ന 2 യുവാക്കൾ ആൾക്കൂട്ടത്തിനു നേരെ മുളകുസ്പ്രേ പ്രയോഗിക്കുകയായിരുന്നു. ഈ സമയത്ത് അക്രമി ഓടിപ്പോകുകയും ചെയ്‌തു. പിടിയിലായവരുടെ പേരുവിവരങ്ങൾ പൊലീസ് പുറത്തുവിട്ടിട്ടില്ല.