രാഹുല്‍ മാങ്കൂട്ടത്തില്‍ വന്‍ ഭൂരിപക്ഷത്തില്‍ വിജയിക്കുമെന്ന് എ.കെ.ആന്റണി
തിരുവനന്തപുരം: പാലക്കാട് യുഡിഎഫ് സ്ഥാനാര്‍ഥി രാഹുല്‍ മാങ്കൂട്ടത്തില്‍ കഴിഞ്ഞ തവണത്തേക്കാള്‍ കൂടുതല്‍ ഭൂരിപക്ഷത്തോടെ വിജയിക്കുമെന്ന് മുതിര്‍ന്ന കോണ്‍ഗ്രസ് നേതാവ് എ.കെ.ആന്റണി. ഈ തിരഞ്ഞെടുപ്പില്‍ പാലക്കാട് ബിജെപിയുടെ വോട്ട് കുത്തനെ കുറയുമെന്നും ആന്റണി അഭിപ്രായപ്പെട്ടു.
സ്ഥാനാര്‍ഥി ആകാന്‍ ആഗ്രഹിക്കുന്നവര്‍ ഒരുപാട് പേരുണ്ടാകും. ഹൈക്കമാന്‍ഡ് ഒരു തീരുമാനമെടുത്താല്‍ കോണ്‍ഗ്രസ് അനുഭാവികള്‍ ആ തീരുമാനത്തോട് ഉറച്ചുനില്‍ക്കും. ഹൈക്കമാന്‍ഡ് തീരുമാനിച്ചാല്‍ ഒറ്റക്കെട്ടായി വോട്ടുപിടിക്കാന്‍ ഇറങ്ങും. ആരെങ്കിലും തുടക്കത്തില്‍ പരിഭവം പറഞ്ഞാലും അതുമാറും. വയനാട്ടില്‍ പ്രിയങ്ക തരംഗമുണ്ടാകുമെന്നും ചേലക്കര രമ്യ ഹരിദാസ് തിരിച്ചുപിടിക്കുമെന്നും അദ്ദേഹം പറഞ്ഞു. പാലക്കാട്ടെ കോണ്‍ഗ്രസ് സ്ഥാനാര്‍ഥി രാഹുല്‍ മാങ്കൂട്ടത്തിലുമായി കൂടിക്കാഴ്ച നടാേത്തിയ ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. പി.സരിന്റെ എതിര്‍പ്പിനെ കുറിച്ചുള്ള ചോദ്യത്തോട് സരിന്‍ അടുത്ത സുഹൃത്താണെന്നും നല്ല പ്രത്യയശാസ്ത്ര വ്യക്തതയുള്ള വ്യക്തിയാണെന്നുമാണ് രാഹുല്‍ മാങ്കൂട്ടത്തില്‍ പ്രതികരിച്ചത്.