‘സംസ്ഥാനത്ത് ഭരണവിരുദ്ധവികാരം'; സർക്കാരിനെ വിമർശിച്ച് പാലക്കാട് സിപിഐ

ലോക്സഭാ തെരഞ്ഞെടുപ്പ് പരാജയത്തിന് ശേഷം സർക്കാരിനെതിരെയുള്ള വിമർശനം സിപിഐയിൽ തുടരുകയാണ്. സിപിഐ പാലക്കാട് ജില്ലാ കൗൺസിലിൽ സർക്കാരിനെ രൂക്ഷമായി വിമർശനവുമായി എത്തിയിരിക്കുകയാണ്. സംസ്ഥാനത്ത് ഭരണവിരുദ്ധ വികാരമാണെന്നും വേണ്ട തിരുത്തലുകൾ വേണമെന്നും കൗൺസിലിൽ ആവശ്യപ്പെട്ടു.

എൽഡിഎഫ് ജനങ്ങളിൽ നിന്നും അകന്നതും ക്ഷേമ പെൻഷൻ മുടങ്ങിയതും മാവേലി സ്റ്റോറിൽ സാധനങ്ങൾ ലഭിക്കാത്തതും ലോക്സഭാ തെരഞ്ഞെടുപ്പിൽ സംഭവിച്ച പരാജയത്തിന് കാരണമെന്നാണ് പാലക്കാട് ജില്ലാ കൗൺസിലിന്റെ വിലയിരുത്തൽ. സിപിഐ തിരുവനന്തപുരം ജില്ലാ കൗൺസിലിലും മുഖ്യമന്ത്രി പിണറായി വിജയനും മന്ത്രിമാർക്കും രൂക്ഷ വിമർശനം ഉയർന്നിരുന്നു. മുഖ്യമന്ത്രിയുടെ ധാർഷ്ട്യം തെരഞ്ഞെടുപ്പ് പരാജയത്തിന് കാരണമായെന്ന് വിമർശനം. മുഖ്യമന്ത്രി മാറാതെ ഭരണം നന്നാകില്ലെന്നായിരുന്നു ജില്ലാ കൗൺസിലിലെ വിമർശനം.