സ്‌കൂട്ടറിലെത്തി മാല പൊട്ടിക്കാന്‍ ശ്രമം: മോഷ്ടാവിനെ യുവതി വണ്ടിയില്‍നിന്നു വലിച്ചുനിലത്തിട്ടു പിടികൂടി
തിരുവനന്തപുരം: സ്‌കൂട്ടറിലെത്തി മാല പൊട്ടിക്കാന്‍ ശ്രമിച്ച മോഷ്ടാവിനെ യുവതി വണ്ടിയില്‍നിന്നു വലിച്ചുനിലത്തിട്ടു പിടികൂടി. മോഷ്ടിച്ച സ്‌കൂട്ടറുമായെത്തി മാല പൊട്ടിച്ച കാട്ടായിക്കോണം ചന്തവിള സ്വപ്‌നാലയത്തില്‍ അനില്‍കുമാറാണ് (40) പിടിയിലായത്. ശനിയാഴ്ച വൈകിട്ട് 5.30നു ചേങ്കോട്ടുകോണം ജംക്ഷനിലാണു സംഭവം.
കാട്ടായിക്കോണം പേരൂത്തല ശ്രീജേഷ് ഹൗസില്‍ എസ്.അശ്വതിയും ഭര്‍ത്താവ് ശ്രീജേഷും ചേങ്കോട്ടുകോണത്തെ സ്വകാര്യആശുപത്രിക്കു മുന്നിലുള്ള മെഡിക്കല്‍ സ്റ്റോറില്‍നിന്നു മരുന്നു വാങ്ങി മടങ്ങുമ്പോഴാണ് അശ്വതിയുടെ 3 പവന്‍ മാല സ്‌കൂട്ടറിലെത്തിയ മോഷ്ടാവ് പൊട്ടിച്ചെടുത്തത്. മാല പല കഷണങ്ങളായി പൊട്ടിപ്പോയി.
ഒരു കഷണവുമായി രക്ഷപ്പെടാന്‍ ശ്രമിക്കുന്നതിനിടെ അശ്വതി മോഷ്ടാവിന്റെ ഷര്‍ട്ടിലും സ്‌കൂട്ടറിലുമായി പിടിച്ചുവലിച്ചു. ഇതിനിടെ മാല പ്രതി വായിലാക്കി. അശ്വതിയെ വലിച്ചിഴച്ച് സ്‌കൂട്ടര്‍ മുന്നോട്ടുപോയെങ്കിലും പിടിവിട്ടില്ല. തുടര്‍ന്നു നിയന്ത്രണം തെറ്റി സ്‌കൂട്ടറില്‍നിന്നു പ്രതി വീണു. ഓടിയെത്തിയ നാട്ടുകാര്‍ ഇയാളെ പിടിച്ചുവച്ചതിനാല്‍ മാല വിഴുങ്ങാനായില്ല.
വീഴ്ചയില്‍ അനില്‍കുമാറിന്റെ തലയ്ക്കും അശ്വതിയുടെ കഴുത്തിനും തോളിനും കാലിനും പരുക്കേറ്റു. വഞ്ചിയൂരില്‍ നിന്നു മോഷ്ടിച്ച സ്‌കൂട്ടറുമായാണ് ഇയാളെത്തിയത്. കഴക്കൂട്ടം പൊലീസ് അറസ്റ്റ് ചെയ്ത പ്രതിയെ റിമാന്‍ഡ് ചെയ്തു. ടെക്‌നോപാര്‍ക്കിലെ ജീവനക്കാരിയാണ് അശ്വതി.