ബ്ലാസ്റ്റേഴ്സ് കപ്പ് സീസൺഫൈവ്: ഫർവാനിയ ബ്ലാസ്റ്റേഴ്സ് ജേതാക്കളായി !

കുവൈറ്റ് സിറ്റി: ബ്ലാസ്റ്റേഴ്സ് കപ്പ് സീസൺഫൈവ് , ട്വന്റി 20 ക്രിക്കറ്റ് ടൂണമെൻ്റിൽ ഫർവാനിയ ബ്ലാസ്റ്റേഴ്സ് ജേതാക്കളായി. വാശിയേറിയ ഫൈനൽ മത്സരത്തിൽ ഫ്രീഡം ഫൈറ്റേഴ്‌സ് കൊച്ചിയെ മൂന്ന് വിക്കറ്റിനു പരാജയപ്പെടുത്തിയാണ് ഫർവാനിയ ബ്ലാസ്റ്റേഴ്സ് കിരീടം നേടിയത്. ആദ്യം ബാറ്റ് ചെയ്ത ഫ്രീഡം ഫൈറ്റേഴ്‌സ് കൊച്ചിക്ക് നിശ്ചിത 20 ഓവറിൽ ഒമ്പത് വിക്കറ്റ് നഷ്ടത്തിൽ 134 റൺസെടുക്കാനെ കഴിഞ്ഞുള്ളു. മറുപടി ബാറ്റിങ്ങിനിറങ്ങിയ ഫർവാനിയ ബ്ലാസ്റ്റേഴ്സ് ഏഴ് വിക്കറ്റ് നഷ്ടത്തിൽ 18.3 ഓവറിൽ ലക്ഷ്യം കണ്ടു. ഫൈനലിലെ ഓൾറൗണ്ട് പ്രകടനത്തിൻ്റെ അടിസ്ഥാനത്തിൽ അനൂപ് ലാൽ മാൻ ഓഫ് ദി മാച്ച് ആയി. ലൂസേഴ്‌സ് ഫൈനലിൽ റോയൽസ് യുണൈറ്റഡിനെ പരാജയപ്പെടുത്തി സാറ്റർഡേ ലയൺസ് മൂന്നാം സ്ഥാനം നേടി.

ടൂർണമെന്റിലുടനീളം സ്ഥിരതയാർന്ന പ്രകടനം കാഴ്ചവെച്ച റിസ്‌വാൻ മൗലാനയെ പ്ലെയർ ഓഫ് ദ ടൂർണമെന്റായും റാഫിയെ മികച്ച ബാറ്റ്സ്മാനായും സുധാകറിനെ മികച്ച ബൗളറായും അരുൺ പിറവത്തെ മികച്ച ഫീൽഡർ ആയും ഹാഷിമിനെ
മികച്ച വിക്കറ്റ് കീപ്പറായും തിരഞ്ഞെടുത്തു.അനൂപ് ബേബി ജോൺ (കൊച്ചിൻ സ്റ്റുഡിയോ), ശ്യാം പ്രസാദ് (കോഴിക്കോട് ജില്ലാ എൻ ആർ ഐ അസോസിയേഷൻ), അരുൺ പിറവം (ടൂർണമെൻ്റ് കോഡിനേറ്റർ) എന്നിവർ സമ്മാനങ്ങൾ വിതരണം ചെയ്തു. കുവൈത്തിൽ ആദ്യമായി പരീക്ഷണാടിസ്ഥാനത്തിൽ ഡി ആർ എസ്സ് നടപ്പിലാക്കിയ ടൂർണമെൻ്റ് ആയിരുന്നു ഇത്.