കേബിള്‍ ടിവി ടെക്‌നീഷ്യന്‍ ഷോക്കേറ്റ് മരിച്ച നിലയില്‍

മണ്ണഞ്ചേരി /ആലപ്പുഴ: മരം വീണ് പൊട്ടിയ കേബിള്‍ ടി.വിയുടെ കേബ്ള്‍ നന്നാക്കാനെത്തിയ ടെക്‌നീഷ്യന്‍ വൈദ്യുതാഘാതമേറ്റ് മരിച്ചു. ആര്യാട് പഞ്ചായത്ത് 13-ാം വാര്‍ഡ് പഷ്ണമ്പലത്തുവെളി പി. പ്രജീഷ് (38)ആണ് മരിച്ചത്.

പാതിരപ്പള്ളി പാട്ടുകുളത്തിന് സമീപം ബുധനാഴ്ച രാവിലെയാണ് പ്രജീഷിനെ മരിച്ച നിലയില്‍ കണ്ടെത്തിയത്. ആലപ്പുഴയിലെ കേബിള്‍ ടി.വി സ്ഥാപനത്തിന്റെ ടെക്‌നീഷ്യനായ പ്രജീഷ് ചൊവ്വാഴ്ച വൈകീട്ടാണ് കേബിള്‍ നന്നാക്കാന്‍ എത്തിയത്. ബൈക്ക് റോഡില്‍ വെച്ച ശേഷം നടന്നാണ് കേബ്ള്‍ പൊട്ടിയ ഭാഗത്തേക്ക് പോയത്. രാത്രി ശക്തമായ മഴയും കാറ്റും വൈദ്യുതി തടസവുമുണ്ടായിരുന്നതിനാല്‍ നാട്ടുകാരും ശ്രദ്ധിച്ചിരുന്നില്ല.

ഇവിടെ വൈദ്യുതി കമ്പികള്‍ ഇല്ലാത്തതിനാല്‍ കേബിളിലൂടെ എത്തിയ വൈദ്യുതിയാവും അപകടകാരണമെന്നാണ് പൊലീസിന്റെ നിഗമനം. ബുധനാഴ്ച രാവിലെ സമീപത്തെ വീട്ടുകാരാണ് പ്രജീഷ് വെള്ളക്കെട്ടിലേക്ക് തെറിച്ചു വീണ് മരിച്ച നിലയില്‍ കാണുന്നത്. തുടര്‍ന്ന് മണ്ണഞ്ചേരി പൊലീസെത്തി മൃതദേഹം ആലപ്പുഴ മെഡിക്കല്‍ കോളജ് ആശുപത്രിയിലേക്ക് മാറ്റി.

മൃതദേഹം ആശുപത്രിയിലേക്ക് മാറ്റുവാന്‍ വൈകിയെന്ന് ആരോപിച്ച് നാട്ടുകാരുടെ പ്രതിഷേധവും ഉണ്ടായി. വൈദ്യുതാഘാതമാണ് മരണകാരണമെന്ന് പോസ്റ്റ്‌മോര്‍ട്ടം നടത്തിയ ഡോക്ടര്‍ പറഞ്ഞതായി പൊലീസ് പറഞ്ഞു.

വിനീതയാണ് പ്രജീഷിന്റെ ഭാര്യ. മക്കള്‍: പ്രണവ്, പ്രവണ്‍.