മൂന്നുവയസുകാരന അദ്ധ്യാപിക ക്രൂരമായി മര്‍ദിച്ചെന്ന് പരാതി

കൊച്ചി: കൊച്ചിയില്‍ മൂന്നുവയസുകാരന് ക്രൂര മര്‍ദനമേറ്റതായി പരാതി. കൊച്ചി മട്ടാഞ്ചേരിയില്‍ എല്‍കെജി വിദ്യാര്‍ത്ഥിയായ 3 വയസുകാരനെയാണ് അധ്യാപിക ക്രൂരമായി മര്‍ദിച്ചത്. മട്ടാഞ്ചേരി പാലസ് റോഡിലെ സ്മാര്‍ട്ട് കിഡ് എന്ന സ്ഥാപനത്തിലാണ് സംഭവം. അധ്യാപിക കുട്ടിയുടെ പുറത്ത് ചൂരല്‍ പ്രയോഗം നടത്തുകയായിരുന്നു.

അധ്യാപികയുടെ ചോദ്യങ്ങള്‍ക്ക് മറുപടി പറയാത്തതിനായിരുന്നു മര്‍ദനമെന്നാണ് മാതാപിതാക്കള്‍ പറയുന്നത്. ഇന്നലെയാണ് സംഭവം. കുഞ്ഞിന്റെ പുറം ചൂരല്‍ കൊണ്ട് തല്ലിപ്പൊളിക്കുകയായിരുന്നു അധ്യാപിക. സംഭവത്തില്‍ അധ്യാപികയെ സസ്‌പെന്റ് ചെയ്തിട്ടുണ്ട്. അതേസമയം, മാതാപിതാക്കളുടെ പരാതിയില്‍ മട്ടാഞ്ചേരി പൊലീസ് കേസെടുത്ത് അന്വേഷണം തുടങ്ങി.