മുഖ്യമന്ത്രിയുടെ ഫ്ളെക്സ് മാറ്റേണ്ട;
മറ്റുള്ളവയ്ക്ക് 5000 രൂപ പിഴയിടുന്നു

തിരുവനന്തപുരം: കേരളീയത്തിന്റെയും നവകേരള സദസിന്റെയും പേരിൽ മുഖ്യമന്ത്രിയുടെയും മന്ത്രിമാരുടെയും ചിത്രമുള്ള ഫ്ളെക്സ് ബോർഡുകൾ നാടെമ്പാടും നിരന്നിരിക്കെ അവ ഒഴികെയുള്ള മറ്റ് പ്രചരണ ബോർഡുകൾക്കും പരസ്യ ഫ്ളെക്സുകൾക്കും 5000 രൂപ പിഴ. പാതയോരങ്ങളിൽ സ്ഥാപിച്ചിരിക്കുന്ന പ്രചരണ ബാനറുകളും ഫ്ളെക്സ് ബോർഡുകളും നീക്കാനുള്ള തദ്ദേശ ഭരണവകുപ്പിന്റെ സർക്കുലറിന് പിന്നാലെയാണ് സർക്കാരിനെ പ്രകീർത്തിക്കുന്നതും മുഖ്യമന്ത്രിയുടെ മുഖമുള്ളതുമായ ഫ്ളെക്സ് ബോർഡുകൾ മാറ്റാതെയാണ് മറ്റുള്ളവയ്ക്കെതിരെ പിഴ. അനധികൃതമായി കൊടിതോരണങ്ങളും ബാനറുകളും ബോർഡുകളും സ്ഥാപിച്ചതിന് കഴിഞ്ഞ രണ്ടാഴ്ചയ്ക്കിടെ തിരുവനന്തപുരം കോർപറേഷനിൽ 62 പേർക്ക് 5000 രൂപ വീതം പിഴ ചുമത്തി.
അനധികൃതമായി സ്ഥാപിച്ചിട്ടുള്ള ബോർഡുകൾ, ബാനറുകൾ, കൊടിതോരണങ്ങൾ എന്നിവ ഓരോന്നിനും പിഴ ചുമത്തുന്നത് കൂടാതെ അവ സ്ഥാപിച്ചവർക്കെതിരെ പ്രോസിക്യൂഷൻ നടപടി ആരംഭിക്കാനും നടപടി തുടങ്ങിയിട്ടുണ്ട്.
പൊതുസ്ഥലങ്ങളിൽ പരസ്യം സ്ഥാപിക്കുന്നതു സംബന്ധിച്ച മുനിസിപ്പാലിറ്റി നിയമത്തിലെ (1999) വ്യവസ്ഥപ്രകാരമാണ് പിഴ. ഇതിനു പുറമേ, തദ്ദേശ സ്ഥാപന അധികൃതർ ആവശ്യപ്പെടുന്നതനുസരിച്ച് പൊലീസ് കേസ് രജിസ്റ്റർ ചെയ്യും. ഗതാഗത തടസ്സം സൃഷ്ടിക്കുക, പൊതുജനശല്യം, പൊതുസ്ഥലത്ത് ജനങ്ങൾക്ക് അപകടം വരുത്തുന്ന നടപടികൾ തുടങ്ങിയ വകുപ്പുകൾ പ്രകാരമായിരിക്കും കേസ്.
ഹൈക്കോടതി നിർദേശാനുസരണം രൂപീകരിച്ച കമ്മിറ്റികളാണ് നടപടി സ്വീകരിക്കേണ്ടത്. ഇതിനായി തദ്ദേശ സ്ഥാപന തലത്തിൽ പ്രാദേശിക സമിതിയും ജില്ലാ തലത്തിൽ നിരീക്ഷണ സമിതിയും കഴിഞ്ഞ വർഷം ഡിസംബറിൽ രൂപീകരിച്ചു. ഇവ പരാജയമാണെന്നു കോടതി ഈ വർഷം ജനുവരിയിൽ വിലയിരുത്തി. തുടർന്ന്, കോടതി നിയോഗിച്ച അമിക്കസ് ക്യൂറിയുടെ റിപ്പോർട്ട് കൂടി പരിഗണിച്ച ശേഷം ഉടനടി പിഴ ഈടാക്കി പ്രോസിക്യൂഷൻ നടപടികളിലേക്കു കടക്കാൻ കഴിഞ്ഞ മാസം നിർദേശിച്ചതോടെയാണ് ഇപ്പോഴത്തെ ഉത്തരവ്.
പൊതുസ്ഥലങ്ങളിൽ ബോർഡുകളും ബാനറുകളും കൊടിതോരണങ്ങളും സ്ഥാപിക്കാൻ തദ്ദേശ സ്ഥാപനങ്ങളുടെ അനുമതി തേടണമെന്നാണു ചട്ടം. ബോർഡുകളുടെ വിസ്തീർണവും മറ്റും വ്യക്തമാക്കി സ്കെച്ച് നൽകുന്നത് ഉൾപ്പെടെ നടപടിക്രമമുണ്ട്. എന്നാൽ, ഇവ പാലിക്കാറില്ല. നാലു വർഷത്തിലേറെയായി ഇതു സംബന്ധിച്ച് ഹൈക്കോടതിയിൽ നിയമനടപടികൾ നടക്കുകയാണ്.