വിരമിച്ചവർക്ക് വർധിപ്പിച്ച ​ഗ്രാറ്റുവിറ്റി നൽകണം; ധനമന്ത്രിക്ക് കെജിഒയു സംഘടന കത്തുനൽകി

തിരുവനന്തപുരം: സംസ്ഥാന സർവീസിൽ നിന്ന് വിരമിച്ച ജീവനക്കാർക്ക് പുതുക്കിയ ക്ഷാമബത്ത പ്രകാരം ​ഗ്രാറ്റുവിറ്റി നൽകണമെന്ന് ആവശ്യപ്പെട്ട് കേരളാ ​ഗസറ്റഡ് ഓഫീസേഴ്സ് യൂണിയൻ ധനമന്ത്രി കെഎൻ ബാല​ഗോപാലിന് കത്തുനൽകി. 2021 ജൂലൈ ഒന്നുമുതൽ കേരളത്തിലെ സർക്കാർ ജീവനക്കാർക്കും അധ്യാപകർക്കും ക്ഷാമബത്ത ഏഴുശതമാനത്തിൽ നിന്നും ഒമ്പതു ശതമാനമായി ഈവർഷം ഏപ്രിൽ ഒന്നുമുതൽ ലഭിച്ചിരുന്നു. എന്നാൽ പെൻഷൻ ആനുകൂല്യങ്ങൾ ലഭിക്കുന്നതാനായി പേപ്പറുകൾ തയ്യാറാക്കി അയക്കുന്ന സമയത്ത് ഏഴുശതമാനം ക്ഷാമബത്ത ആയിരുന്ന ജീവനക്കാർക്ക് ഈ നിരക്ക് കണക്കാക്കിയാണ് ഗ്രാറ്റുവിറ്റി അനുവദിച്ച് നൽകിയിട്ടുള്ളത്.

ഈ ജീവനക്കാർക്ക് 2021 ജൂലൈ ഒന്നുമുതൽ ഡിഎ ഒമ്പതു ശതമാനം ലഭിക്കാൻ അർഹതയുണ്ടെങ്കിലും ​ഗ്രാറ്റുവിറ്റി ഒമ്പത് ശതമാനം നിരക്കിൽ ലഭിച്ചിട്ടില്ലെന്ന് കെജിഒയു സംസ്ഥാന പ്രസിഡന്റ് കെ.സി സുബ്രഹ്മണ്യൻ കത്തിൽ ചൂണ്ടിക്കാട്ടി. അതിനാൽ, അർഹതയുള്ള ഗ്രാറ്റുവിറ്റി ലഭിക്കുന്നതിനാവശ്യമായ സർക്കാർ ഉത്തരവുണ്ടെങ്കിൽ മാത്രമേ 9 ശതമാനം അക്കൗണ്ടൻ്റ് ജനറൽ അനുവദിക്കുകയുള്ളു. അത് നൽകുന്നതിനുള്ള (ഗ്രാറ്റുവിറ്റി) നിർദ്ദേശത്തിനായി സർക്കാരിന് ഏറെ നാളുകളായി കത്ത് നൽകിയിട്ടും സർക്കാരിൽ നിന്ന് ഒരു മറുപടിയും ലഭിച്ചില്ലെന്നാണ് അക്കൗണ്ടന്റ് ജനറൽ അറിയിച്ചിരിക്കുന്നത്. അർഹതയുള്ള ഗ്രാറ്റുവിറ്റി അരിയർ ലഭിക്കുന്നതിനാവശ്യമായ നടപടി സ്വീകരിക്കണമെന്നും കത്തിൽ ആവശ്യപ്പെട്ടിട്ടുണ്ട്.