വാഹനാപകടത്തിൽ അച്ഛനും മകനും ദാരുണാന്ത്യം

കൊച്ചി: കാർ സ്കൂട്ടറിൽ ഇടിച്ച് അച്ഛനും മകനും ദാരുണാന്ത്യം. ഇളംകുളം സ്വദേശി ഡെന്നി റാഫേലും മകൻ ഡെന്നിസൺ ഡെന്നിയുമാണ് മരിച്ചത്. ഇവർ സഞ്ചരിച്ച സ്കൂട്ടർ സ്കോർപിയോ കാറുമായി ഇടിച്ചാണ് അപകടം ഉണ്ടായത്. സംഭവത്തിൽ കാർ ഡ്രൈവർ പാലക്കാട് സ്വദേശി സുജിത്തിനെ പൊലീസ് അറസ്റ്റ് ചെയ്തു.

മദ്യ‌ലഹരിയിലായിരുന്നു ഇയാൾ വാഹനമോടിച്ച് സ്കൂട്ടർ ഇടിച്ചുതെറിപ്പിച്ചതായാണ് വിവരം. ഇയാൾക്കെതിരെ 304 എ വകുപ്പ് പ്രകാരം കേസെടുത്തിട്ടുണ്ട്. അർദ്ധരാത്രി കഴിഞ്ഞ് വൈറ്റില പൊന്നുരുന്നി റെയിൽവെ മേൽപ്പാലത്തിലാണ് അപകടം നടന്നത്. അപകടത്തിൽ സ്കൂട്ടർ പൂർണമായി തകർന്നു. ഭാര്യ സോണിയ, മകൾ ഡെൻസിയ. ഡെന്നിസൺ പൊന്നുരുന്നി സി കെ സി ഹൈസ്കൂളിലെ ആറാം ക്ലാസ്സ് വിദ്യാർത്ഥിയാണ്.