ചാരിറ്റി സംഘടനയുടെ പേരിൽ തട്ടിപ്പ്; 2 പേർ പിടിയിൽ

ഏറ്റുമാനൂർ: ചാരിറ്റി സംഘടനയുടെ പേരിൽ ഏറ്റുമാനൂർ പേരൂർ സ്വദേശികളായ വീട്ടമ്മമാരെ കബളിപ്പിച്ചു പണം തട്ടിയെടുത്തെന്ന കേസിൽ പേരൂർ 101 കവല ശങ്കരാമലയിൽ മേരി കുഞ്ഞുമോൻ (63), അയ്മനം ഭാഗത്തു വാടകയ്ക്കു താമസിക്കുന്ന ചേമ്പളം കൗന്തി കിഴക്കേകൊഴുവനാൽ ജെസി ജോസഫ് (54) എന്നിവരെ ഏറ്റുമാനൂർ പൊലീസ് അറസ്റ്റ് ചെയ്തു. കേസിൽ പ്രതികളുടെ എണ്ണം ഇനിയും വർദ്ധിക്കുമെന്നാണ് പൊലീസ് പറയുന്നത്. പ്രതികളെ കോടതി റിമാൻഡ് ചെയ്തു.എറണാകുളത്തുള്ള ഒരു ജീവകാരുണ്യ സംഘടന മുഖേന വിദേശത്തുനിന്നു തങ്ങൾക്കു പണം ലഭിക്കുമെന്നു വിശ്വസിപ്പിച്ചാണു പ്രതികൾ വീട്ടമ്മമാരെ കബളിപ്പിച്ചതെന്നു പൊലീസ് വ്യക്തമാക്കി. സർവീസ് ചാർജ് അടയ്ക്കാൻ പണം തന്നു സഹായിച്ചാൽ കമ്മിഷനായി ലക്ഷങ്ങൾ നൽകാമെന്നു വിശ്വസിപ്പിച്ചു പലതവണകളായി ലക്ഷങ്ങൾ തട്ടിയിരുന്നെന്നും പൊലീസ് പറഞ്ഞു.