ഇരകൾക്കും വേട്ടക്കാർക്കുമൊപ്പം ഒരുപോലെ നിലകൊള്ളുന്ന സർക്കാർ: രാഹുൽ മാങ്കൂട്ടത്തിൽ

പാലക്കാട്‌: ഇരകൾക്കും വേട്ടക്കാർക്കും ഒപ്പം ഒരേപോലെ നിലകൊള്ളുന്ന കപടതയുടെ മുഖംമൂടിയണിഞ്ഞ ഭരണകൂടമാണ് കേരളത്തിലെതെന്ന് പാലക്കാട് നിയോജകമണ്ഡലം യുഡിഎഫ് സ്ഥാനാർത്ഥി രാഹുൽ മാങ്കൂട്ടത്തിൽ. വാളയാർ കുട്ടികളുടെ നീതിക്കുവേണ്ടി സമരസമിതി സംഘടിപ്പിച്ച ഏകദിന സത്യാഗ്രഹ സമരത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. കുട്ടികളുടെ മരണത്തിന് കാരണക്കാരായവർ രക്ഷപ്പെടുന്നതിന് വഴിയൊരുക്കിയത് സംസ്ഥാന സർക്കാരാണ്. കേസിന്റെ ആദ്യഘട്ടം മുതൽ പ്രോസിക്യൂഷൻ സമ്പൂർണ്ണ പരാജയം ആയിരുന്നു. കുട്ടികളുടെ നീതിക്കുവേണ്ടി സാധ്യമായത് ഒന്നും തന്നെ ഈ സർക്കാർ ചെയ്തിട്ടില്ല. ഹൈക്കോടതി പോലും ഒരു ഘട്ടത്തിൽ പ്രോസിക്യൂട്ടറെയും സർക്കാരിനെയും വിമർശിക്കുക വരെയുണ്ടായി. ഹൈക്കോടതി പോലും വിമർശിച്ചിട്ടും ഏതുവിധേനയും പ്രതികൾക്ക് സംരക്ഷണം ഒരുക്കുക എന്ന പിടിവാശിയാണ് വിഷയത്തിൽ ഗവൺമെന്റ് സ്വീകരിച്ചത്. കുട്ടികളുടെ നീതിക്കുവേണ്ടിയുള്ള പോരാട്ടത്തിന് എല്ലാവിധ പിന്തുണയും ഉണ്ടാകുമെന്നും അദ്ദേഹം കൂട്ടിച്ചേർത്തു.