പുതുവർഷാശംസ പറഞ്ഞില്ല; തൃശ്ശൂരിൽ യുവാവിനെ കുത്തിപ്പരിക്കേൽപ്പിച്ചു

തൃശ്ശൂർ: പുതുവർഷാശംസ പറയാത്തതിന് തൃശ്ശൂരിൽ യുവാവിനെ കുത്തിപ്പരിക്കേൽപ്പിച്ചു. തൃശ്ശൂർ മുള്ളൂർക്കരയിലാണ് സംഭവം. ആറ്റൂർ സ്വദേശി സുഹൈബിനാണ്(22) കുത്തേറ്റത്.ക്രിമിനല്‍ കേസുകളില്‍ പ്രതിയായ ഷാഫിയാണ് കുത്തിയത്. പുതുവർഷാശംസ നേരാത്തതായിരുന്നു പ്രകോപനമെന്നാണ് വിവരം. സുഹൈബും നാല് സുഹൃത്തുക്കളും ചെറുതുരുത്തിയില്‍ നിന്ന് ഗാനമേള കഴിഞ്ഞു മടങ്ങുന്നതിനിടെ മുള്ളൂർക്കരയിലെ ഒരു ബസ് സ്റ്റോപ്പില്‍ കയറിയിരുന്നു. ഷാഫിയും സുഹൃത്തുക്കളും അവിടേക്കെത്തുകയും ഇവരോട് ഹാപ്പി ന്യൂ ഇയർ പറയുകയും ചെയ്തു. സുഹൈബും കൂട്ടരും തിരിച്ചു പറഞ്ഞില്ല. തുടർന്നുണ്ടായ തർക്കത്തിലാണ് സുഹൈബിന് കുത്തേല്‍ക്കുന്നതെന്നാണ് നിഗമനം.സുഹൈബ് ഗുരുതരാവസ്ഥയില്‍ മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. ദേഹത്ത് 24 തവണയോളം കുത്തേറ്റിട്ടുണ്ട്.