ഗാസ മുനമ്പിൽ സമാധാന പ്രതീക്ഷ; യുദ്ധം അവസാനിപ്പിക്കാൻ നിർണായകചർച്ച

ദോഹ: ഗാസ യുദ്ധം അവസാനിപ്പിക്കാൻ നാഴികക്കല്ലായുള്ള വെടിനിർത്തൽ കരാറിൻ്റെ അന്തിമ കരട്, ഇസ്രയേലിനും ഹമാസിനും കൈമാറിയതായി ഖത്തർ അധികൃതർ സ്ഥിരീകരിച്ചു. ഇരു കൂട്ടരും കരാറിന്റെ കരട് അംഗീകരിച്ചെന്ന് അന്തർദേശീയ മാധ്യമങ്ങൾ റിപ്പോർട്ട് ചെയ്‌തു. ഖത്തർ പ്രധാനമന്ത്രിയുടെ നേതൃത്വത്തിൽ, ഇസ്രയേൽ ചാരമേധാവികളും യുഎസ് മിഡിൽ ഈസ്റ്റ് പ്രതിനിധികളും ദോഹയിൽ നടത്തിയ ചർച്ചയിലൂടെ കരാർ അടുക്കുന്നതായ സൂചനകളാണ് ലഭിക്കുന്നത്.

അമേരിക്കൻ പ്രസിഡൻ്റ് ജോ ബൈഡൻ ജനുവരി 20ന് സ്ഥാനമൊഴിയുന്നതിന് മുമ്പ് വെടിനിർത്തൽ കരാറിൽ ഒപ്പുവെപ്പിക്കാൻ അതിവേഗ നീക്കമാണ് നടത്തുന്നത്. ഇസ്രയേൽ, കരാറുമായി ബന്ധപ്പെട്ട റിപ്പോർട്ടുകൾ നിഷേധിച്ചിരിക്കുകയാണ്. എന്നാൽ വൈറ്റ് ഹൗസ്, ബൈഡനും ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹുവുമായുള്ള ചർച്ചകൾക്കുശേഷം കാര്യങ്ങൾ പുരോഗമിക്കുന്നുവെന്ന സൂചനയും നൽകുന്നുണ്ട്.

2023 ഒക്ടോബറിൽ ഹമാസ് ഇസ്രയേലിനെ ആക്രമിച്ചതിന് പിന്നാലെ ആരംഭിച്ച പ്രത്യാക്രമണത്തിൽ ഗാസയിൽ വലിയ ദുരന്തമാണുണ്ടായത്. ഇപ്പോഴുണ്ടാകുന്ന വെടിനിർത്തൽ കരാർ, ധാരാളം ജീവൻ രക്ഷിക്കാനാകുമെന്ന പ്രതീക്ഷയാണ് ജനങ്ങളിൽ. വെടിനിർത്തലിനൊപ്പം, ബന്ദികളുടെ മോചനവും കരാറിന്റെ ഭാഗമാക്കാനുള്ള ശ്രമം സമാധാനത്തിനുള്ള പുതിയ വാതിലുകൾ തുറക്കുമെന്നാണ് വിശ്വാസം.