കല കുവൈറ്റ്‌ സാംസ്കാരിക മേള ദ്യുതി 2024 ഒക്ടോ. 25ന് മുരുകൻ കട്ടാക്കട സംബന്ധിക്കും
കുവൈറ്റ്‌ സിറ്റി : കേരള ആർട്ട്‌ ലാവേഴ്‌സ് അസോസിയേഷൻ - കല സംഘടിപ്പിക്കുന്ന ഈ വർഷത്തെ മെഗാ സാംസ്കാരിക മേള 'ദ്യുതി 2024 ' ന്റെ ഒരുക്കങ്ങൾ പൂർത്തിയായതായി ഭാരവാഹികൾ വാർത്താ സമ്മേളനത്തിൽ അറിയിച്ചു. ഒക്ടോബർ 25ന് ഹവല്ലി പാർക്ക് ഓഡിറ്റോറിയത്തിൽ നടക്കുന്ന പരിപാടിയിൽ കവിയും മലയാളം മിഷൻ ഡയറക്ടറുമായ മുരുകൻ കാട്ടാക്കട മുഖ്യാതിഥിയായി പങ്കെടുക്കും. വൈകുന്നേരം 3 മണി മുതൽ സാംസ്കാരിക സമ്മേളനം ആരംഭിക്കും .
45-ാമത് പ്രവർത്തന വർഷത്തിന്റെ ഭാഗമായി ആരംഭിച്ച ഭവന നിർമ്മാണ പദ്ധതിയിൽ പൂർത്തീകരിച്ച വീടിന്റെ താക്കോൽ വേദിയിൽ വെച്ച് മുഖ്യാതിഥി കല അംഗമായാ എറണാകുളം സ്വദേശി ബിന്ദു ശങ്കരന് കൈമാറും. കല കുവൈറ്റ്‌ കൈത്തിരി രണ്ടാം പതിപ്പിന്റെ പ്രകാശനവും, ബാലകലാ മേളയിൽ ഓവറോൾ ചാമ്പ്യൻഷിപ്പ് നേടിയ സ്‌കൂളിനും, കലാ തിലകം - കലാ പ്രതിഭ കളായി തെരെഞ്ഞെടുക്കപ്പെട്ട വർക്കും, സാഹിത്യ മത്സരങ്ങളിലെ വിജയികൾക്കുമുള്ള സമ്മാനദാനവും മുഖ്യാതിഥി നിർവഹിക്കും. പ്രശസ്ത പിന്നണി ഗായകരായ സച്ചിൻ ദേവ്, ആര്യ ദയാൽ, അതുൽ നറുകര എന്നിവർ നയിക്കുന്ന ഗാന സന്ധ്യയും മറ്റ് കലാ പരിപാടികളും വേദിയിൽ അരങ്ങേറും.മെഗാ സാംസ്കാരിക മേളയിൽ കുവൈറ്റിലെ സാമൂഹിക സാംസ്കാരിക രംഗത്തെ പ്രമുഖരും, മാധ്യമ പ്രവർത്തകരും സംബന്ധിക്കും. പരിപാടിയിലേക്ക് കുവൈറ്റിലെ മുഴുവൻ മലയാളി സമൂഹത്തെയും സ്വാഗതം ചെയ്യുന്നതായി ഭാരവാഹികൾ അറിയിച്ചു. ഇത് സംബന്ധിച്ച് അബ്ബാസിയ കാലിക്കറ്റ്‌ ഷെഫ് റസ്റ്റോറന്റിൽ നടന്ന പത്രസമ്മേളനത്തിൽ കല കുവൈറ്റ്‌ പ്രസിഡന്റ് അനുപ് മങ്ങാട്ട്, ജനറൽ സെക്രട്ടറി സജി തോമസ് മാത്യു, ദ്യുതി 2024 ജനറൽ കൺവീനർ ജെ സജി, കല കുവൈറ്റ്‌ ട്രഷറർ അനിൽ കുമാർ, വൈസ് പ്രസിഡന്റ് റിച്ചി കെ ജോർജ്, ജോയിൻ സെക്രട്ടറി ബിജോയ്‌, മീഡിയ വിഭാഗം സെക്രട്ടറി പ്രജോഷ് എന്നിവർ പങ്കെടത്തു.