കല്യാണി പ്രിയദർശൻ - നസ്‍ലെൻ സിനിമയുടെ ഷൂട്ടിംഗ് സംഘത്തിന്റെ കാറിനുനേരെ കാട്ടാന ആക്രമണം

തൃശ്ശൂർ: അതിരപ്പിള്ളിയിൽ കല്യാണി പ്രിയദർശൻ - നസ്‍ലെൻ സിനിമയുടെ ഷൂട്ടിംഗ് ലൊക്കേഷനിലേക്ക് പോയ കാറിന് നേരെ കാട്ടാന ആക്രമണം. ഇന്ന് രാവിലെ ആറര മണിയോടെയാണ് സംഭവം. അതിരപ്പിള്ളി കണ്ണംകുഴിയിൽ വെച്ചാണ് ഒറ്റയാൻ കാർ അക്രമിച്ചത്. കണ്ണംകുഴി സ്വദേശിയായ അനിലിൻ്റെ കാർ ആണ് ഒറ്റയാൻ തകർത്തത്. ഷൂട്ടിങ്ങിന് വേണ്ടി ആളുകളുമായി അനിൽ ലൊക്കേഷനിലേക്ക് വരുന്ന വഴിക്കാണ് കണ്ണംകുഴി ഭാഗത്ത് വെച്ച് റോഡിന് നടുവിൽ നിലയുറപ്പിച്ച കാട്ടാന വാഹനത്തെ ആക്രമിച്ചത്. അരുൺ ഡൊമിനിക് ഒരുക്കുന്ന കല്യാണി - നസ്ലൻ ചിത്രത്തിന്റെ ഷൂട്ടിംഗ് ഇപ്പോൾ അതിരപ്പിള്ളി മേഖലയിൽ പുരോഗമിക്കുകയാണ്.