കട്ടപ്പന സിഐയെന്ന വ്യാജേന വിദ്യാർഥിനിയുമായി മുറിയെടുത്തു; സുവിശേഷപ്രസംഗകൻ കൂടിയായ കരാട്ടെമാസ്റ്റർ അറസ്റ്റിൽ

ഇടുക്കി: കട്ടപ്പന സിഐയെന്ന വ്യാജേന എട്ടാം ക്ലാസ് വിദ്യാർഥിനിയുമായി ലോഡ്‌ജിൽ മുറിയെടുത്തയാളെ പോക്‌സോ കേസിൽ അറസ്റ്റുചെയ്തു. വിവിധ സ്‌കൂളുകളിൽ കരാട്ടെ അധ്യാപകനായ പെരുംതൊട്ടി ചക്കാലക്കൽ ജോൺസൺനെയാണ് (സണ്ണി-51) കട്ടപ്പന പോലീസ് അറസ്റ്റ് ചെയ്തത്. കരാട്ടെ ക്യാമ്പിന്റെ പേരിൽ വെള്ളിയാഴ്ച രാവിലെ പെൺകുട്ടിയുമായെത്തി കട്ടപ്പന നഗരത്തിലെ ലോഡ്ജിൽ മുറിയെടുത്തു. താൻ കട്ടപ്പന സിഐ ആണെന്നാണ് ലോഡ്ജ് നടത്തിപ്പുകാരെ പരിചയപ്പെടുത്തിയത്. എന്നാൽ സംശയം തോന്നിയ ലോഡ്ജ് ജീവനക്കാർ പോലീസിൽ വിവരം അറിയിക്കുകയായിരുന്നു. തുടർന്ന് പോലീസെത്തിയപ്പോൾ കൂടെയുള്ളത് മകളാണെന്ന് പറഞ്ഞ് പ്രതി രക്ഷപ്പെടാൻ ശ്രമിച്ചുവെങ്കിലും ചോദ്യംചെയ്യലിൽ ഇത് തെറ്റാണെന്ന് മനസ്സിലായി. തുടർന്നാണ് പോക്സോ വകുപ്പനുസരിച്ച് ഇയാൾക്കെതിരേ കേസെടുത്തത്. പ്രതി സുവിശേഷ പ്രസംഗകൻകൂടിയാണ്. പ്രതിയെ റിമാൻഡ് ചെയ്തു.