ശമ്പളം നിഷേധിച്ച് സിവിൽ സർവീസിനെ തകർക്കാൻ ഇടത് സർക്കാർ ശ്രമിക്കുന്നു; ചവറ ജയകുമാർ

തിരുവനന്തപുരം: ചരിത്രത്തിൽ ആദ്യമായി ഒന്നാം തീയതി ശമ്പളം നൽകാതെ സർക്കാർ ജീവനക്കാരെ വഞ്ചിച്ച ഭരണകൂടം സിവിൽ സർവീസിന് ചരമഗീതം എഴുതാൻ തയ്യാറെടുക്കുകയാണെന്ന് കേരള എൻജിഒ അസോസിയേഷൻ സംസ്ഥാന പ്രസിഡൻറ് ചവറ ജയകുമാർ പറഞ്ഞു. ആരോഗ്യം, ആഭ്യന്തരം, ട്രഷറി, പട്ടികജാതി വികസനം, വനം തുടങ്ങി ആദ്യ ദിനത്തിൽ ശമ്പളം വിതരണം ചെയ്യന്ന വകുപ്പുകളിലാണ് ഇന്ന് ശമ്പളം മുടങ്ങിയത്.അതിരൂക്ഷമായ വിലക്കയറ്റമാണ സംസ്ഥാനത്തുള്ളത്. പൊതുവാഹന സൗകര്യം വളരെ പരിമിതം. ഇന്ധന സെസ് മൂലം ഇരുചക്രവാഹനയാത്ര പോലും ദുസഹമായിരിക്കുന്നു. ജനവിരുദ്ധ നയങ്ങളുമായി മുന്നോട്ടു പോകുന്ന ഭരണകൂടം സർക്കാർ ജീവനക്കാരുടെ മേഖലയിൽ മാത്രം തടഞ്ഞു വച്ചിരിക്കുന്നത് 50000 കോടി രൂപയുടെ ശമ്പളവും അലവൻസുകളുമാണ്.
2021 ജനുവരി മുതൽ ഏഴുഗഡുക്കളിലായി 21% ക്ഷാമബത്തയാണ് കുടിശിക. അതിൽ രണ്ട് ശതമാനം ഒരു ഗഡു ഏപ്രിൽ മുതൽ നൽകുമെന്ന് ബജറ്റിൽ പ്രഖ്യാപിച്ചു എങ്കിലും പ്രതീക്ഷയ്ക്ക് വകയില്ല. 2019 ജൂലൈ പ്രാബല്യത്തിൽ നടത്തിയ പതിനൊന്നാം ശമ്പള പരിഷ്കരണത്തിന്റെ അരിയർ തുക ഇതേവരെ ലഭ്യമായിട്ടില്ല. ലീവ് സറണ്ടർ ആനുകൂല്യം കിട്ടിയിട്ട് 5 വർഷമായെന്നും അദ്ദേഹം കുറ്റപ്പെടുത്തി.

എന്തിനും ഏതിനും സാമ്പത്തിക പ്രതിസന്ധി എന്ന വിലപിക്കുന്ന സർക്കാർ ധൂർത്തിന് യാതൊരു കുറവും വരുത്തുന്നില്ല.
ആഘോഷങ്ങൾക്കും ആഡംബരങ്ങൾക്കുമായി ഓരോ ദിവസവും കോടികളാണ് ട്രഷറി നിയന്ത്രണം ഇല്ലാതെ അനുവദിക്കുന്നത്. കേരളത്തിൻ്റെ ജി എസ് ടി വരുമാനം ഇരട്ടിയിൽ അധികമായി വർദ്ധിച്ചിരിക്കുന്നു. മറ്റ് മേഖലകളിൽ നിന്നുള്ള വരുമാനവും കുത്തനെ കൂടിയിട്ടുണ്ട്. പക്ഷേ ഇതെല്ലാം വഴിതിരിച്ചുവിടുന്ന ബജറ്റ് ഇതര ചെലവുകൾ ആണ് സമ്പദ് വ്യവസ്ഥയെ താറുമാറാക്കുന്നത്. ഇതിൻറെ പാപഭാരം ജീവനക്കാരുടെ തലയിൽ കെട്ടിവയ്ക്കാൻ ശ്രമിക്കുകയാണ്. കേന്ദ്രം കൂടുതൽ കടമെടുക്കാൻ അനുവദിക്കുന്നില്ല എന്ന് പറയുന്നവർ കടമെടുത്ത പണം ചെലവഴിച്ചതിന്റെ വിവരങ്ങൾ പൊതുസമൂഹത്തിനു മുന്നിൽ വയ്ക്കാൻ തയ്യാറാകുന്നില്ല. ഒന്നാം തീയതി പെൻഷൻ ലഭിക്കേണ്ട പെൻഷൻ കാർ ദുരിതക്കയത്തിലാണ്. ആശുപത്രി ചെലവുകൾക്കും ജീവിത ചെലവുകൾക്കും അവർക്ക് മറ്റൊരു മാർഗ്ഗമില്ല. ജീവിതത്തിൻറെ സായാഹ്നത്തിൽ ആനുകൂല്യങ്ങൾ ലഭിക്കാതെ മരണമടയേണ്ടി വന്നത് 90000 ത്തോളം പെൻഷൻകാർക്കാണ്. ഒരുമാസം ജോലി ചെയ്തതിനുശേഷം ശമ്പളം നൽകാൻ കഴിയില്ലെന്ന് പറയുന്ന സർക്കാർ നിലപാട് അംഗീകരിക്കാൻ കഴിയില്ല. തൊഴിൽ ദാതാവ് എന്ന നിലയിൽ ശമ്പളം ഉറപ്പുവരുത്തേണ്ടത് സർക്കാരിൻ്റെ ബാധ്യതയാണ്. ശമ്പളം മുടങ്ങുന്ന സാഹചര്യം തുടരുകയാണെങ്കിൽ സംസ്ഥാന വ്യാപകമായി പ്രക്ഷോഭം സംഘടിപ്പിക്കുമെന്ന് അദ്ദേഹം അറിയിച്ചു.