ഐ.എസിനേക്കാള്‍ വലിയ ഭീകരസംഘടനയാണ് സിപിഎം : കെ എം ഷാജി
തിരുവനന്തപുരം: ഐ.എസ് ഐ എസിനേക്കാള്‍ വലിയ ഭീകരസംഘടനയാണ് കണ്ണൂരില്‍ പി.ജയരാജന്‍ നേതൃത്വം നല്‍കിയിരുന്ന സി.പി.എം എന്ന് മുസ്‌ലിം ലീഗ് നേതാവ് കെ.എം ഷാജി. അരിയില്‍ ഷുക്കൂര്‍ വധക്കേസ് ആര്‍.എസ്.എസ്-സി.പി.എം ബാന്ധവത്തിന്റെ തെളിവാണെന്നും കെ.എം ഷാജി പറഞ്ഞു. കേസ് സി.ബി.ഐക്ക് വിടണമെന്ന് ആവശ്യപ്പെട്ട് അന്നത്തെ ആഭ്യന്തരമന്ത്രി തിരുവഞ്ചൂര്‍ രാധാകൃഷ്ണന്‍ പ്രധാനമന്ത്രിയുടെ കീഴിലുള്ള പേഴ്‌സണല്‍ മന്ത്രാലയത്തിന് കത്തയച്ചപ്പോള്‍ അത് തള്ളിക്കളയുകയായിരുന്നു അവര്‍ ചെയ്തത്. പിന്നീട് കോടതി ഇടപെടലിലാണ് കേസ് സി.ബി.ഐക്ക് വിട്ടത്.
കേസില്‍ എന്തെങ്കിലും നീക്കുപോക്കുണ്ടാകുമോയെന്ന് നോക്കാനാണ് കഴിഞ്ഞ ദിവസം പി.ജയരാജന്‍ ഐ.എസുമായി ബന്ധപ്പെട്ട പരാമര്‍ശം നടത്തിയതെന്നും ഷാജി പറഞ്ഞു. കൊന്നവരെയല്ല കൊല്ലിച്ചവരെ നിയമത്തിന് മുന്നില്‍ കൊണ്ടു വരാനാണ് ഷുക്കൂര്‍ വധക്കേസിന്റെ തുടക്കം മുതല്‍ മുസ്‌ലിം ലീഗ് ശ്രമിച്ചതെന്നും അദ്ദേഹം പറഞ്ഞു.
ടി.പി ചന്ദ്രശേഖരന്‍ വധക്കേസിലും ഇതേ പാറ്റേണ്‍ തന്നെയാണ് മുസ്‌ലിം ലീഗ് പിന്തുടര്‍ന്നത്. കൊന്നവ?ര്‍ക്കൊപ്പം കൊല്ലിച്ചവര്‍ കൂടി പ്രതിക?ളായതോടെയാണ് കണ്ണൂരിലെ രാഷ്ട്രീയം കുറേക്കൂടി ശാന്തമായതെന്നും കെ.എം ഷാജി പറഞ്ഞു.
മുസ്‌ലിം ലീഗ് പ്രവര്‍ത്തകന്‍ അരിയില്‍ ഷൂക്കൂറിനെ കൊലപ്പെടുത്തിയ കേസില്‍ സി.പി.എം നേതാക്കള്‍ വിചാരണ നേരിടണമെന്ന് കോടതി ഉത്തരവിട്ടിരുന്നു. കണ്ണൂര്‍ മുന്‍ ജില്ലാ സെക്രട്ടറി പി.ജയരാജനും മുന്‍ എം.എല്‍.എ ടി.വി രാജേഷിന്റെയും വിടുതല്‍ ഹരജി തള്ളിയാണ് സി.ബി.ഐ പ്രത്യേക കോടതിയുടെ ഉത്തരവ് പുറത്ത് വന്നത്. കേസില്‍ വിചാരണ കൂടാതെ വിടുതല്‍ നല്‍കണമെന്ന് ആവശ്യപ്പെട്ട് 2023 ജനുവരിയിലാണ് പി.ജയരാജനും ടി.വി.രാജേഷും സിബിഐ സ്‌പെഷല്‍ കോടതിയില്‍ സംയുക്തമായി വിടുതല്‍ ഹര്‍ജി നല്‍കിയത്. ഇതാണ് ഇന്ന് സിബിഐ സ്‌പെഷല്‍ കോടതി ജഡ്ജി പി.ശബരിനാഥന്‍ തള്ളിയത്.