കൊച്ചി മെട്രോ സർവീസ് 7 മിനിറ്റ് തടസ്സപ്പെട്ടു

കൊച്ചി: ട്രെയിനിന്റെ തകരാറുമൂലം കൊച്ചി മെട്രോ സർവീസ് 7 മിനിറ്റ് തടസ്സപ്പെട്ടു. ആലുവയിൽ നിന്നു തൃപ്പൂണിത്തുറയ്ക്കുള്ള ട്രെയിനിന് രാവിലെ 8: 30 നു പത്തടിപ്പാലത്തിനു സമീപത്തുവച്ചാണു നേരിയ തകരാറുള്ളതായി മനസ്സിലായത്. ട്രെയിൻ പത്തടിപ്പാലത്തു നിർത്തിയിട്ടു തകരാർ താൽക്കാലികമായി പരിഹരിച്ചു. രാവിലെ 8: 30 നുണ്ടായ തടസ്സം മൂലം മറ്റു സ്റ്റേഷനുകളിലും സർവീസ് വൈകി.
തുടർന്നു തൃപ്പൂണിത്തുറവരെ യാത്രക്കാരുമായി സർവീസ് നടത്തിയ ട്രെയിൻ അവിടെ സർവീസ് അവസാനിപ്പിച്ചു. പകരം ട്രെയിൻ ഉപയോഗിച്ച് തുടർന്നുള്ള സർവീസുകൾ നടത്തി. മുട്ടം മെട്രോ യാഡിൽ എത്തിച്ചു ട്രെയിനിന്റെ തകരാർ പരിഹരിച്ചതായി കെഎംആർഎൽ അറിയിച്ചു.