പ്രവാസി പുരസ്‌കാര ജേതാവ് വർഗ്ഗീസ് പുതുകുളങ്ങരക്ക് എയർപോർട്ടിൽ സ്വീകരണം നൽകി!
കുവൈറ്റ് സിറ്റി : വീക്ഷണം പ്രവാസി പുരസ്‌കാരം നേടി തിരിച്ചെത്തിയ ഒഐസിസി കുവൈറ്റ് പ്രസിഡന്റ് ശ്രീ വർഗ്ഗീസ് പുതുകുളങ്ങരക്ക് ഒഐസിസി നേതാക്കളും പ്രവർത്തകരും ചേർന്ന് കുവൈറ്റ് എയർപോർട്ടിൽ സ്വീകരണം നൽകി. വീക്ഷണം ദിനപ്പത്രത്തിന്റെ 48 - മത് വാർഷികത്തോടനുബന്ധിച്ച് എറണാകുളം ശ്രീ ഗോകുലം ഹോട്ടലിൽ നടന്ന പുരസ്‌കാര മേളയിൽ വെച്ച് കർണ്ണാടക ഊർജ്ജ മന്ത്രിയും കോൺഗ്രസ്സ് വർക്കിങ് കമ്മിറ്റി അംഗവുമായ ശ്രീ കെ ജെ ജോർജ് ആണ് ശ്രീ വർഗീസ് പുതുകുളങ്ങരക്ക് അവാർഡ് സമ്മാനിച്ചത്.
പ്രമുഖ എഴുത്തുകാരി ഡൊ. എം ലീലാവതി ക്ക് സി പി ശ്രീധരൻ സർഗ്ഗ ശ്രേഷ്ഠ അവാർഡും അഗതികൾക്കായി വീടൊരുക്കുന്നതിൽ കാരുണ്യത്തിന്റെ ദീപമായ സിസ്റ്റർ ലിസി ചക്കാലക്കൽനു ഉമ്മൻ ചാണ്ടി കർമ്മ ശ്രേഷ്ഠ പുരസ്കാരവും പ്രമുഖ മാധ്യമ പ്രവർത്തകൻ ശ്രി ആർ രാജഗോപാലിന് വീക്ഷണം മാധ്യമ പുരസ്കാരവും തദവസരത്തിൽ നൽകുകയുണ്ടായി. ശ്രീമതി മറിയാമ്മ ഉമ്മൻ ആയിരുന്നു സിസ്റ്റർ ലിസി ചക്കാലക്കലിന് ഉമ്മൻ‌ചാണ്ടി യുടെ പേരിലുള്ള അവാർഡ് സമ്മാനിച്ചത്. വീക്ഷണം ജീവനക്കാരനായിരുന്ന ശ്രി പി മുഹമ്മദലിക്ക് ലൈഫ് ടൈം അക്ചീവ്മെന്റ് അവാർഡ് , ഐ ടി - വ്യവസായ രംഗത്തെ പ്രമുഖ വ്യക്തിത്വങ്ങളായ സർവ്വശ്രീ ഷിജോ കെ തോമസ്, ആന്റണി വൈദ്യർ, എൻ ജഹാംഗീർ, ജെബി കെ ജോൺ എന്നിവർക്ക് ബിസിനസ് എക്സല്ലൻസ് അവാർഡുകളും നല്കപ്പെടുകയുണ്ടയി.
വീക്ഷണം മാനേജിങ് ഡയറക്ടർ ശ്രീ ജെയ്‌സൺ ജോസഫ് സ്വാഗത പ്രസംഗം നടത്തിയ ചടങ്ങിൽ കെപിസിസി പ്രസിഡന്റ് ശ്രീ കെ സുധാകരൻ എം പി അധ്യക്ഷനായിരുന്നു. പ്രതിപക്ഷ നേതാവ് ശ്രീ വി ഡി സതീശൻ മുഖ്യ പ്രഭാഷണം നടത്തി. കോൺഗ്രസ്സ് വർക്കിങ് കമ്മിറ്റി അംഗങ്ങൾ അടങ്ങിയ കെപിസിസി നേതാക്കളുംകോൺഗ്രസ്സ് എം പി മാരും എം എൽ എ മാരും ജില്ലാ നേതാക്കളും വീക്ഷണം ജീവനക്കാരും ചേർന്ന് സമ്പന്നമാക്കിയ പുരസ്‌കാര മേളയിൽ വീക്ഷണം കുടുംബത്തിലെ ജീവനക്കാർ അവതരിപ്പിച്ച കലാ പ്രകടനങ്ങൾ ശ്രദ്ധേയമായി.