മിന്നൽ ചുഴലി; നെടുമ്പാശ്ശേരിയിൽ വ്യാപക നാശം

നെടുമ്പാശേരി: പാറക്കടവ് പഞ്ചായത്തിലെ തിടുക്കേലി ഭാഗത്ത് ഇന്നലെ ഉച്ചയ്ക്ക് ഉണ്ടായ മിന്നൽ ചുഴലിയിൽ മരം വീണ് വീടുകൾ തകർന്നും കാർഷിക വിളകൾ നശിച്ചും വ്യാപക നാശം. മരം വീണ് 3 വീടുകൾ ഭാഗികമായി തകർന്നു. അതെസമയം മരങ്ങൾ പലതും വൈദ്യുതി ലൈനിൽ വീണതിനാൽ പ്രദേശത്ത് വൈദ്യുതി തടസ്സവും അനുഭവപ്പെട്ടു.

പാടത്തി ഉണ്ണിയുടെ വീടിന്റെ ഓടു മേഞ്ഞ മേൽക്കൂര പൂർണമായും തകർന്നു. ഈ സമയം വീടിനുള്ളിൽ ആരുമുണ്ടായിരുന്നില്ല. ഇരിമ്പൻ ആന്റണിയുടെ വീടിന്റെ മേൽക്കൂരയ്ക്ക് മുകളിൽ അടുത്തു നിന്ന പുളിമരം പതിച്ചെങ്കിലും അടുക്കളയിലുണ്ടായിരുന്ന ഭാര്യ മേരി പരുക്കേൽക്കാതെ രക്ഷപ്പെട്ടു.

കണ്ണോളി പറമ്പിൽ തിലകന്റെ വീടിനോടു ചേർന്നു നിന്ന പുളിമരവും കോൺക്രീറ്റ് വീടിന് മുകളിലേക്കു മറിഞ്ഞു വീണു. ഒട്ടേറെപ്പേരുടെ കൃഷികളും നശിച്ചിട്ടുണ്ട്. വാഴ, ജാതി, തെങ്ങ്, കവുങ്ങ് തുടങ്ങിയവയും ഫലവൃക്ഷങ്ങളും നശിച്ചു.