നവകേരള സദസിനായി മാവേലിക്കര ഗവ.ബോയ്‌സ് ഹൈസ്‌കൂള്‍ മതില്‍ പൊളിച്ചു; പ്രതിഷേധിച്ച് കോണ്‍ഗ്രസ്
മാവേലിക്കര: മാവേലിക്കര ഗവ.ബോയ്‌സ് ഹൈസ്‌കൂള്‍ മതില്‍ പൊളിച്ചതിനെത്തുടര്‍ന്ന് വിവാദം. ഇന്നലെ രാത്രി ജെസിബി ഉപയോഗിച്ചാണ് മതില്‍ പൊളിച്ചത്. നവകേരള സദസ് നടക്കുന്ന വേദിയാണ് സ്‌കൂള്‍. മുഖ്യമന്ത്രിയും സംഘവും സഞ്ചരിക്കുന്ന വാഹനം കയറുന്നതിന് മതില്‍ പൊളിക്കണമെന്ന് ആവശ്യപ്പെട്ട് എംഎല്‍എ അധികൃതര്‍ക്ക് കത്ത് നല്‍കിയിരുന്നു. എന്നാല്‍ നഗരസഭ ആവശ്യം തള്ളി.
ദുരന്തനിവാരണ സമിതി ചെയര്‍മാനായ കലക്ടര്‍ മതില്‍ പൊളിച്ചു പുനര്‍നിര്‍മിക്കണമെന്ന് ഉത്തരവിട്ടു. എന്നാല്‍ ഫണ്ടില്ലെന്ന് നഗരസഭ അറിയിച്ചു. ഇതിനിടെ മതിലിന്റെ ഒരു ഭാഗം പൊളിഞ്ഞു. മതില്‍ പൊളിഞ്ഞതല്ല സാമൂഹിക വിരുദ്ധര്‍ പൊളിച്ചതാണെന്ന നിഗമനത്തിലായിരുന്നു നഗരസഭ കൗണ്‍സില്‍. പൊളിഞ്ഞ ഭാഗം കോണ്‍ഗ്രസിന്റെ നേതൃത്വത്തില്‍ പുനര്‍നിര്‍മിച്ചു. എന്നാല്‍ ഇന്നലെ രാത്രി മതില്‍ പൂര്‍ണമായും പൊളിച്ചു നീക്കുകയായിരുന്നു. ഇതിനെതിരെ കോണ്‍ഗ്രസിന്റെ മനുഷ്യച്ചങ്ങല സംഘടിപ്പിച്ചു.