' രാഹുലിനായി ആവേശക്കോട്ടകെട്ടി'; പരസ്യപ്രചാരണത്തിന് കൊട്ടിക്കലാശം

പാലക്കാട്‌: പാലക്കാടൻ കാറ്റിനെ ചൂടുപിടിപ്പിച്ച ഉപതെരഞ്ഞെടുപ്പ് പരസ്യപ്രചാരണത്തിന് കൊട്ടിക്കലാശം.
ആവേശം അണപൊട്ടി ഒഴുകിയ അവസാന മണിക്കൂറിൽ ആവേശക്കോട്ടകെട്ടിയാണ് 35 ദിവസം നീണ്ടുനിന്ന യുഡിഎഫ് സ്ഥാനാർഥി രാഹുൽ മാങ്കൂട്ടത്തിന്റെ തെരഞ്ഞെടുപ്പ് പ്രചാരണത്തിന് പരിസമാപ്തി കുറിച്ചത്. ഉച്ചയോടെ ഒലവക്കോട് നിന്നും കൂറ്റൻ റോഡ് ഷോകളുമായാണ് അവസാനഘട്ട പ്രചാരണം ആരംഭിച്ചത്. നൂറുകണക്കിന് ഇരുചക്ര വാഹനങ്ങളുടെ അകമ്പടിയോടെ പാലക്കാട് നഗരം ചുറ്റിയ റോഡ് ഷോ അഞ്ചരയോടെ സ്റ്റേഡിയം സ്റ്റാൻഡ് പരിസരത്ത് എത്തിച്ചേർന്നു. തുടർന്ന് ജില്ലയുടെ വിവിധ ഭാഗങ്ങളിൽ നിന്ന് എത്തിയ ആയിരക്കണക്കിന് യുഡിഎഫ് പ്രവർത്തകരുടെയും വാദ്യമേളങ്ങളും തീർത്ത ആവേശ തിരമാലയിൽ വെടിക്കെട്ടു തീർത്ത് ആറുമണിയോടെ തെരഞ്ഞെടുപ്പ് പരസ്യ പ്രചാരണത്തിന് കലാശം കൊട്ടിയത്.

കൊട്ടിക്കലാശത്തിൽ സംഘര്‍ഷം ഒഴിവാക്കാന്‍ വലിയ പോലീസ് സന്നാഹത്തേയാണ് പാലക്കാട് ഏര്‍പ്പെടുത്തിയത്.നാളെ നിശബ്ദ പ്രചരണം കഴിഞ്ഞ് ബുധനാഴ്ചയാണ് പാലക്കാട് ബൂത്തിലേക്ക് നീങ്ങുന്നത്.