പേടിച്ചു വിറച്ച് നവകേരള സദസ്, പൊലീസ് കോട്ട കെട്ടി പിണറായി

കണ്ണൂർ: യൂത്ത് കോൺ​ഗ്രസ്- കെഎസ്‌യു പ്രതിഷേധത്തിൽ ഭയന്നു വിറച്ച് കണ്ണൂരിലെ നവകേരള സദസ് പൊലീസ് കോട്ടയ്ക്കു നടുവിലേക്കു മാറ്റി. മുഖ്യമന്ത്രിക്കെതിരെ ഇന്നലെ ഉണ്ടായ യൂത്ത് കോൺഗ്രസ് പ്രതിഷേധത്തിന്റെ പശ്ചാത്തലത്തിലാണ് വേദികളിൽ കൂടുതൽ സുരക്ഷ ഏർപ്പെടുത്തിയത്. നിലവിൽ മൂവായിരത്തോളം പൊലീസ് ഉദ്യോ​ഗസ്ഥരാണ് മുഖ്യമന്ത്രിക്കു കാവൽ നിൽക്കുന്നത്. പരാതിക്കാർ രണ്ടായിരത്തോളവും.
ഇന്നു പരാതിക്കാർ പോലും സൂക്ഷ്മ നിരീക്ഷണത്തിലായിരിക്കും. പരിശോധന കൂടാതെ ഒരാളെപ്പോലും വേദിക്കരികിലേക്കു കടത്തില്ല. മുഖ്യമന്ത്രി പങ്കെടുക്കുന്ന പരിപാടികൾക്കു ചുറ്റും കൂടുതൽ പൊലീസിനെ നിയോ​ഗിച്ചിരിക്കയാണ്. മഫ്ത്തിയിലും പൊലീസ് സാഹചര്യങ്ങൾ നിരീക്ഷിക്കുന്നുണ്ട്.

നവ കേരള സദസ്സ് കണ്ണൂർ ജില്ലയിൽ ഇന്നും തുടരും. കണ്ണൂർ ജില്ലയിൽ രണ്ടാം ദിനമായ ഇന്ന് പ്രതിഷേധം കണക്കിലെടുത്ത് കനത്ത സുരക്ഷയാണ് ഒരുക്കിയിട്ടുള്ളത്. അഴീക്കോട്, കണ്ണൂർ, ധർമ്മടം, തലശ്ശേരി മണ്ഡലങ്ങളിലാണ് ഇന്ന് നവകേരള സദസ്സ് നടക്കുക. ഈ മണ്ഡലങ്ങൾക്ക് പുറമേ മട്ടന്നൂർ, പേരാവൂർ, കൂത്തുപറമ്പ് മണ്ഡലങ്ങളിലെ പൗരപ്രമുഖരുമായി രാവിലെ 9 മണിക്ക് മുഖ്യമന്ത്രിയും മന്ത്രിമാരും സംവദിക്കും.