ലൈംഗികാതിക്രമ പരാതിയില്‍ നടന്‍ ജയസൂര്യക്കെതിരെ പൊലീസ് കേസെടുത്തു

തിരുവനന്തപുരം: ലൈംഗികാതിക്രമ പരാതിയില്‍ നടന്‍ ജയസൂര്യക്കെതിരെ പൊലീസ് കേസെടുത്തു. നടിയുടെ പരാതിയില്‍ തിരുവനന്തപുരം കന്റോണ്‍മെന്റ് പൊലീസാണ് കേസെടുത്തത്. സെക്രട്ടറിയേറ്റില്‍ സിനിമാ ചിത്രീകരണത്തിനിടെ നടന്‍ ലൈംഗികാതിക്രമം നടത്തിയതായി നടി ആരോപിച്ചിരുന്നു.

സിനിമാ മേഖലയിലെ ലൈംഗികാതിക്രമ പരാതികള്‍ അന്വേഷിക്കുന്ന പ്രത്യേക സംഘം ഇന്നലെ നടിയുടെ മൊഴി രേഖപ്പെടുത്തിയിരുന്നു. സെക്ഷന്‍ 354, 354 എ, 509 എന്നീ വകുപ്പുകളാണ് നടനെതിരെ ചുമത്തിയത്.

ജയസൂര്യ ഉള്‍പ്പെടെ ഏഴ് പേര്‍ക്കെതിരെ നടി ലൈംഗികാതിക്രമ ആരോപണമുന്നയിച്ചിരുന്നു. ജയസൂര്യയെ കൂടാതെ മുകേഷ്, ഇടവേള ബാബു, മണിയന്‍പിള്ള രാജു എന്നിവര്‍ക്കും പ്രൊഡക്ഷന്‍ കണ്‍ട്രോളര്‍മാരായ നോബിള്‍, വിച്ചു, ലോയേഴ്സ് കോണ്‍ഗ്രസ് സംസ്ഥാന പ്രസിഡന്റും പ്രൊഡ്യൂസറുമായ അഡ്വ. വി.എസ്. ചന്ദ്രശേഖരന്‍ എന്നിവര്‍ക്കുമെതിരെയാണ് പരാതി.