ഭീകരരുടെ സാന്നിധ്യം: തിരച്ചില് ആരംഭിച്ചു
ജമ്മു: ജമ്മു കശ്മീരിലെ പൂഞ്ച് ജില്ലയിലെ ഗ്രാമത്തില് രണ്ട് ഭീകരരുടെ സാന്നിധ്യമുണ്ടെന്ന വിവരത്തെ തുടര്ന്ന് വ്യാപക തിരച്ചില് ആരംഭിച്ചതായി സുരക്ഷ ഉദ്യോഗസ്ഥര് അറിയിച്ചു. തിങ്കളാഴ്ച രാത്രി ഡെഹ്റ കി ഗാലിക്ക് സമീപമുള്ള സലാംപുര ഗ്രാമത്തില് കറുത്ത വസ്ത്രം ധരിച്ച രണ്ട് ആയുധധാരികളായ പ്രതികള് നീങ്ങുന്നത് കണ്ടതായി നാട്ടുകാര് അധികൃതരെ അറിയിക്കുകയായിരുന്നു.
വിവരമറിഞ്ഞയുടന് രാഷ്ട്രീയ റൈഫിള്സ്, സി.ആര്.പി.എഫ്, പൊലീസ് എന്നിവരുടെ സംയുക്ത ഓപ്പറേഷന് ആരംഭിക്കുകയായിരുന്നു. ഭീകരരെന്ന് സംശയിക്കുന്നവര് താഴ്ന്ന പംഗൈയിലേക്ക് നീങ്ങുന്നത് കണ്ടതായും തിരച്ചില് നടക്കുന്നുണ്ടെന്നും സൈന്യം അറിയിച്ചു.
പൂഞ്ചിലെ സുരന്കോട്ട് ഏരിയയിലെ സനായി, ജംഗല്, പട്ടാന്, കിഷ്ത്വാര് ജില്ലയിലെ ദ്രബ്ഷല്ല മേഖലയിലെ ബംഗാര്-സരൂര് വനം എന്നിവിടങ്ങളിലെ സമീപ ഗ്രാമങ്ങളിലും സുരക്ഷാ സേന ചൊവ്വാഴ്ച രാവിലെ തിരച്ചില് ആരംഭിച്ചതായി ഉദ്യോഗസ്ഥര് പറഞ്ഞു. കഴിഞ്ഞദിവസം ദോഡ ജില്ലയില് ഭീകരരുമായുള്ള ഏററുമുട്ടലില് മേജര് അടക്കം നാലുസൈനികര് വീരമൃത്യു വരിച്ചിരുന്നു.