തെരഞ്ഞെടുപ്പ് പര്യടനത്തിനിടയില്‍ പിറന്നാള്‍ നിറവില്‍ രാഹുല്‍ മാങ്കൂട്ടത്തില്‍
പാലക്കാട്; യുഡിഎഫ് സ്ഥാനാര്‍ത്ഥി രാഹുല്‍ മാങ്കൂട്ടത്തിന് രാവിലെ മുതല്‍ക്കേ പിറന്നാള്‍ ആശംസകളുടെ പ്രവാഹമായിരുന്നു. ഫോണിലൂടെയും നേരിട്ടും ഒട്ടേറെ പേര്‍ അവരുടെ പ്രിയപ്പെട്ട സാരഥിക്ക് പിറന്നാള്‍ ആശംസകള്‍ നേര്‍ന്നു. രാവിലെ പിരായിരി പഞ്ചായത്തിലെ ഗൃഹസന്ദര്‍ശത്തിനിടയില്‍ വോട്ട് തേടുമ്പോള്‍ അവരില്‍ ഏറെ പേരും രാഹുലിനോട് തിരികെ പിറന്നാള്‍ ആശംസകള്‍ നേരുകയായിരുന്നു.
ഗൃഹ സന്ദര്‍ശനം കഴിഞ്ഞശേഷം കൊടുന്തരപ്പിള്ളിയില്‍ എത്തിയപ്പോള്‍ സ്ഥാനാര്‍ത്ഥിക്ക് സഹപ്രവര്‍ത്തകര്‍ സര്‍പ്രൈസ് ആയൊരു പിറന്നാള്‍ ആഘോഷം ഒരുക്കിയിരുന്നു. യുഡിഎഫ് പ്രവര്‍ത്തകര്‍ക്കൊപ്പം രാഹുല്‍ കേക്ക് മുറിച്ച് പിറന്നാള്‍ ആഘോഷിച്ചു. കെപിസിസി ജനറല്‍ സെക്രട്ടറി സി ചന്ദ്രന് കേക്ക് നല്‍കിയായിരുന്നു രാഹുല്‍ പിറന്നാള്‍ മധുരം പങ്കുവെച്ചത്. സഹപ്രവര്‍ത്തകനും യൂത്ത്‌കോണ്‍ഗ്രസ് മുന്‍ നേതാവുമായ റിയാസ് മുക്കോളി രാഹുലിനായി പിറന്നാള്‍ ഗാനവും സമ്മാനിച്ചു. തെരഞ്ഞെടുപ്പ് പര്യടനത്തിന് ഇടയില്‍ പിറന്നാള്‍ ആഘോഷിക്കുവാന്‍ കഴിഞ്ഞതില്‍ അതിയായ സന്തോഷമുണ്ടെന്നും രാഹുല്‍ പ്രതികരിച്ചു