വ്യോമയാന രംഗത്ത് നേട്ടങ്ങളുമായി സൗദി അറേബ്യ; സമയക്രമം പാലിക്കുന്നതിൽ റിയാദ് കിംഗ് ഖാലിദ് അന്താരാഷ്ട്ര വിമാനത്താവളം മുന്നില്‍

കൃത്യസമയത്ത് വിമാനങ്ങള്‍ യാത്ര പുറപ്പെടുന്ന വിമാനത്താവളങ്ങളുടെ ആഗോള പട്ടികയില്‍ റിയാദ് കിംഗ് ഖാലിദ് അന്താരാഷ്ട്ര വിമാനത്താവളം മുന്നില്‍. സമയതിന്റെ കാര്യത്തിൽ കൃത്യത പാലിക്കുന്ന വിമാന കമ്പനികളില്‍ സൗദി അറേബ്യയുടെ സൗദിയ രണ്ടാം സ്ഥാനം കരസ്ഥമാക്കി. ഏവിയേഷന്‍ അനലിറ്റിക്‌സ് കമ്പനിയായ സിറിയം തയ്യാറാക്കിയ റിപ്പോര്‍ട്ടിലാണ് ആഗോള വ്യോമയാന രംഗത്തെ കാര്യക്ഷമത വിലയിരുത്തിയത്.

മെക്‌സികോ എയര്‍ലൈനായ ഏയ്‌റോമെക്‌സികോയാണ് സമയനിഷ്ഠ പാലിക്കുന്നതില്‍ ലോകത്ത് മുന്നില്‍ നില്‍ക്കുന്നത്. 90 ശതമാനത്തിന് മുകളിലാണ് എയ്‌റോ മെക്‌സികോയുടെ റാങ്കിംഗ്. രണ്ടാം സ്ഥാനത്തുള്ള സൗദിയ 88.8 ശതമാനം കൃത്യത പാലിക്കുന്നു. 82.5 ശതമാനം കൃത്യസമയത്ത് പുറപ്പെടുന്ന ഖത്തര്‍ എയര്‍വേയ്‌സ് അഞ്ചാം സ്ഥാനത്താണ്. ജി.സി.സിയില്‍ നിന്ന് ഈ രണ്ട് വിമാന കമ്പനികളാണ് പട്ടികയില്‍ ഉള്ളത്.

റിയാദ് കിംഗ് ഖാലിദ് അന്താരാഷ്ട്ര വിമാനത്താവളം വിമാനങ്ങള്‍ കൃത്യസമയത്ത് പുറപ്പെടുന്ന ഒന്നാമത്തെ വിമാനത്താവളമായാണ് തെരഞ്ഞെടുക്കപ്പെട്ടത്. ഓരോ വിമാനങ്ങളും വിമാനത്താവളത്തില്‍ അറൈവല്‍ ടൈമിനും ഡിപാര്‍ച്ചര്‍ ടൈമിനും 14.59 മിനുട്ടിനുള്ളില്‍ എത്തുന്നതിനെ അടിസ്ഥാനമാക്കിയാണ് സമയ കൃത്യത വിലയിരുത്തുന്നത്. 86.5 ശതമാനമാണ് റിയാദ് വിമാനത്താവളത്തിന്റെ റേറ്റിംഗ്.