സംസ്ഥാന സ്‌കൂള്‍ കായികമേള: വിദ്യാര്‍ഥികളെ വലച്ച് വേനല്‍ ചൂട്

കൊച്ചി: സംസ്ഥാന സ്‌കൂള്‍ കായികമേളയില്‍ വിദ്യാര്‍ഥികളെ വലച്ച് കടുത്ത ചൂട്. ഉച്ചവെയിലില്‍ ഗ്രൗണ്ടില്‍ നില്‍ക്കാന്‍ കഴിയാതെ പലരും തണല്‍ ഇടങ്ങളില്‍ തങ്ങി. മഹാരാജാസ് കോളേജ് സ്റ്റേഡിയത്തില്‍ കടുത്ത ചൂട് നിലനില്‍ക്കേയാണ് ഇന്‍ക്ലൂസീവ് വിഭാഗം ജൂനിയര്‍, സീനിയര്‍ കാറ്റഗറി ഫുട്‌ബോള്‍ മത്സരങ്ങള്‍ നടന്നത്.

സംസ്ഥാന കായിക മേളക്കൊപ്പം ഇതാദ്യമായാണ് ഭിന്നശേഷിക്കാരെക്കൂടി ഉള്‍പ്പെടുത്തി ഇന്‍ക്ലൂസീവ് വിഭാഗം മേള നടക്കുന്നത്. മഹാരാജാസ് കോളേജ് സ്റ്റേഡിയത്തില്‍ ചൊവ്വാഴ്ചയാണ് ഇന്‍ക്ലൂസീവ് വിഭാഗത്തിന്റെ മത്സരങ്ങള്‍.

14 ജില്ലകളില്‍ നിന്നായി ആയിരത്തി അറുന്നൂറോളം വിദ്യാര്‍ഥികളാണ് അത്‌ലറ്റിക്‌സ്, ഗെയിംസ് വിഭാഗങ്ങളില്‍ മത്സരിക്കാനെത്തിയത്. ഫുട്‌ബോള്‍, ഷട്ടില്‍ ബോള്‍, ഹാന്റ് ബോള്‍ ഉള്‍പ്പെടെയുള്ള ഗെയിംസ് ഇനങ്ങളാണുള്ളത്. നവംബര്‍ മൂന്ന് മുതല്‍ 11 വരെയാണ് മേള.