കാര്‍ നിയന്ത്രണംവിട്ട് കടകളിലേക്ക് ഇടിച്ചു കയറി അഞ്ചുപേര്‍ക്ക് പരിക്കേറ്റു

കുറ്റിക്കാട്ടൂര്‍ (കോഴിക്കോട്): മാവൂര്‍-കോഴിക്കോട് റോഡില്‍ പൂവാട്ടുപറമ്പ് വളവില്‍ ഇന്നോവ കാര്‍ നിയന്ത്രണംവിട്ട് കടകളിലേക്ക് ഇടിച്ചുകയറി അഞ്ചുപേര്‍ക്ക് പരിക്കേറ്റു. ചൊവ്വാഴ്ച രാവിലെ പത്തരയോടെയാണ് അപകടം. അപകടത്തില്‍ 13 ഇരുചക്ര വാഹനങ്ങളും ഒരു കാറും തകര്‍ന്നു. എടവണ്ണപ്പാറയില്‍നിന്നും കോഴിക്കോട്ടേക്ക് വരികയായിരുന്ന ഇന്നോവ കാറാണ് അപകടത്തില്‍പ്പെട്ടത്.

വളവില്‍ നിയന്ത്രണം വിട്ട് റോഡരികിലെ റോയല്‍ എന്‍ഫീല്‍ഡ് വര്‍ക്ക് ഷോപ്പിലേക്കും തൊട്ടടുത്തുള്ള ടൈല്‍ വില്പന കേന്ദ്രത്തിലേക്കുമാണ് കാര്‍ ഇടിച്ചുകയറിയത്. അപകടത്തില്‍ വര്‍ക്ക് ഷോപ്പില്‍ നിര്‍ത്തിയിട്ട ബുള്ളറ്റുകളും തൊട്ടടുത്തുണ്ടായിരുന്ന മറ്റ് ബൈക്കുകളും ഒരു കാറുമാണ് തകര്‍ന്നത്.

കെട്ടിടത്തിന്റെ അടിഭാഗത്തേക്കുള്ള വഴിയുടെ പാര്‍ശ്വഭിത്തിയില്‍ ഇടിച്ചാണ് കാര്‍ നിന്നത്. കടകളിലും പരിസരത്തും ഉണ്ടായിരുന്നവര്‍ക്കാണ് പരിക്കേറ്റത്. പരിക്കേറ്റ അഞ്ചു പേരെയും കോഴിക്കോട് മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.