രത്തൻ ടാറ്റയ്ക്ക് വിടനൽകി രാജ്യം; സംസ്കാരം ഔദ്യോഗിക ബഹുമതികളോടെ

മുംബൈ: ഇന്ത്യൻ വ്യവസായ രംഗത്തെ അധികായൻ രത്തൻ ടാറ്റയ്ക്ക് വിടനൽകി രാജ്യം. കോർപ്പറേറ്റ് തലവൻമാരും രാഷ്ട്രീയ നേതാക്കളും ചലച്ചിത്ര-കായിക മേഖലകളിലെ താരങ്ങളും ഉൾപ്പടെ ആയിരങ്ങൾ ആദരാഞ്ജലി അർപ്പിക്കാൻ എത്തിയിരുന്നു. മുംബൈയിലെ വോർളി ശ്‌മശാനത്തിലായിരുന്നു സംസ്കാരം.

ഇന്ത്യൻ വ്യവസായ രംഗത്തെ ആഗോള തലത്തിൽ അടയാളപ്പെടുത്തിയ രത്തൻ ടാറ്റയ്ക്ക് രാജ്യം എല്ലാവിധ ബഹുമതികളോടും കൂടിയാണ് അന്ത്യയാത്ര ഒരുക്കിയത്. രാവിലെ പത്ത് മുതൽ സൗത്ത് മുംബൈയിലെ നാഷണൽ സെൻ്റർ ഫോർ പെർഫോമിംഗ് ആർട്സിൽ മൃതദേഹം പൊതുദർശനത്തിനു വച്ചിരുന്നു.

രത്തൻ ടാറ്റയോടുള്ള ആദരസൂചകമായി മഹാരാഷ്ട്രയിൽ ഒരു ദിവസത്തെ ദുഃഖാചരണവും സംസ്ഥാന സർക്കാർ പ്രഖ്യാപിച്ചിരുന്നു. അസുഖ ബാധിതനായി ചികിത്സയിലിരിക്കെ ബുധനാഴ്ച്ച രാത്രിയാണ് അദ്ദേഹം അന്തരിച്ചത്. കേന്ദ്ര സർക്കാരിനെ പ്രതിനിധീകരിച്ച് ആഭ്യന്തര മന്ത്രി അമിത് ഷാ അന്തിമോപചാരം അർപ്പിച്ചു.