ജശോരേശ്വരി ക്ഷേത്രത്തിന് മോദി സമ്മാനിച്ച സ്വർണ കിരീടം മോഷണം പോയി

ന്യൂഡൽഹി: ബംഗ്ലാദേശിലെ സത്ഖിര ജില്ലയിലെ ജശോരേശ്വരി ക്ഷേത്രത്തിന് പ്രധാനമന്ത്രി നരേന്ദ്ര മോദി സമ്മാനിച്ച കാളി ദേവിയുടെ സ്വർണ കിരീടം മോഷണം പോയി. വ്യാഴാഴ്ച ഉച്ചയ്ക്ക് ക്ഷേത്ര പൂജാരി പൂജ കഴിഞ്ഞ് നടയടച്ച് പോയതിന് ശേഷമാണ് മോഷണം. 2021 ലെ ബം​ഗ്ലാദേശ് സന്ദർശന വേളയിലാണ് മോദി സ്വർണ കിരീടം സമർപ്പിച്ചത്. സ്വർണ കിരീടം മോഷണം പോയത് അന്വേഷിക്കണമെന്ന് ബം​ഗ്ലാദേശിനോട് ഇന്ത്യ ആവശ്യപ്പെട്ടു. “സംഭവത്തിൽ ഞങ്ങൾ ഉത്കണ്ഠ പ്രകടിപ്പിക്കുന്നു, മോഷണത്തെക്കുറിച്ച് അന്വേഷിക്കാനും കിരീടം വീണ്ടെടുക്കാനും കുറ്റക്കാർക്കെതിരെ നടപടിയെടുക്കാനും ബംഗ്ലാദേശ് സർക്കാരിനോട് അഭ്യർത്ഥിക്കുന്നു,” ധാക്കയിലെ ഇന്ത്യൻ ഹൈക്കമ്മീഷൻ പ്രസ്താവനയിൽ പറഞ്ഞു.