ഭാര്യയുടെ സ്വർണം പണയംവെച്ച് പണവുമായി മുങ്ങിയ ഭർത്താവ് അറസ്റ്റിൽ

വർക്കല: ഭാര്യയുടെ സ്വർണം പണയംവെച്ച് കിട്ടിയ തുകയുമായി മുങ്ങിയ ഭർത്താവിനെ വർക്കല പോലീസ് അറസ്റ്റു ചെയ്തു. നെയ്യാറ്റിൻകര കലമ്പാട്ടുവിള പള്ളിച്ചൽ ദേവീകൃപയിൽ അനന്തു(34)വിനെയാണ് പോലീസ് പിടികൂടിയത്. 2021 ഓഗസ്റ്റിലായിരുന്നു ഫിസിയോ തെറാപ്പിസ്റ്റായ അനന്തുവും വർക്കല സ്വദേശിനിയായ യുവതിയും തമ്മിലുള്ള വിവാഹം.

വിവാഹശേഷം മൂന്നാംനാൾ ഭാര്യയുടെ 52 പവന്റെ സ്വർണാഭരണങ്ങൾ നിർബന്ധിപ്പിച്ച് പണയംവെച്ച് പതിമൂന്നരലക്ഷത്തിലധികം രൂപ അനന്തു കൈക്കലാക്കിയെന്നാണ് ഭാര്യയുടെ പരാതി. കൂടാതെ വധുവിന്റെ കുടുംബവീടും വസ്തുവും തന്റെ പേരിൽ പ്രമാണം ചെയ്തുകിട്ടണമെന്നും പുതിയ കാർ വാങ്ങിത്തരണമെന്നും ആവശ്യപ്പെട്ട് അനന്തു നിരന്തരമായി വഴക്കുണ്ടാക്കുകയും ഭീഷണിപ്പെടുത്തുകയും ചെയ്തതായും വധു മൊഴിനൽകി. പരാതിയുടെ അടിസ്ഥാനത്തിൽ വർക്കല പോലീസ് കേസെടുത്തതോടെയാണ് അനന്തു പണവുമായി മുങ്ങിയത്. തുടർന്ന് വിവിധ സ്ഥലങ്ങളിൽ ഒളിവിൽ താമസിച്ചുവരുന്നതിനിടയിലാണ് അറസ്റ്റ്.