കപ്പലിടിച്ച് ബാൾട്ടിമോർ പാലം തകർന്ന സംഭവം; കാണാതായ 6 പേരും മരിച്ചുവെന്ന് സൂചന

ബാൾട്ടിമോർ: യു.എസിലെ ബാള്‍ട്ടിമോറില്‍ കപ്പലിടിച്ച് പാലം തകര്‍ന്നുണ്ടായ അപകടത്തില്‍ കാണാതായ ആറുപേരും മരണപ്പെട്ടിട്ടുണ്ടാകാമെന്നു കോസ്റ്റ്ഗാര്‍ഡ്. അപകടം നടന്ന് 18 മണിക്കൂറിലേറെ പിന്നിട്ടതും താപനില മൈനസ് ഡിഗ്രി ആയതിനാലും ഇവരെ ജീവനോടെ കണ്ടെത്താമെന്ന പ്രതീക്ഷ അസ്‌തമിച്ചു. തിരച്ചില്‍ താല്‍ക്കാലികമായി അവസാനിപ്പിച്ചതായും കോസ്റ്റ് ഗാര്‍ഡ് അറിയിച്ചു.

അതേസമയം, പാലത്തില്‍ നിന്ന് നദിയില്‍ വീണ വാഹനങ്ങളുടെ വിശദാംശങ്ങള്‍ അന്വേഷിക്കുകയാണെന്ന് പൊലീസ് അറിയിച്ചു. അഞ്ചിലധികം വാഹനങ്ങള്‍ വെള്ളത്തിനടിയില്‍ ഉള്ളതായാണ് പരിശോധനയില്‍ അറിഞ്ഞത്‌. കപ്പലിലെ വൈദ്യുതി ബന്ധംനിലച്ചതാണ് അപകടത്തിന് കാരണം എന്നാണ് പ്രാഥമിക നിഗമനം. ഇന്ത്യക്കാരായ 22 ജീവനക്കാരും സുരക്ഷിതരാണ്.