ചാലിയാറിലെ മൃതദേഹങ്ങൾ വീണ്ടെടുക്കാൻ നടത്തിയ പ്രവർത്തനങ്ങൾ സാഹോദര്യത്തിന്റെ ഉത്തമ ഉദാഹരണം : പ്രിയങ്ക ഗാന്ധി
മലപ്പുറം: വയനാട് ഉരുൾപൊട്ടൽ ദുരന്തത്തെ തുടർന്ന് ചാലിയാറിലൂടെ ഒഴുകിയെത്തിയ മൃതദേഹങ്ങൾ വീണ്ടെടുക്കാൻ നടത്തിയ പ്രവർത്തനങ്ങൾ ഈ ജനതയുടെ സാഹോദര്യത്തിന്റെ ഉത്തമ ഉദാഹരണമാണെന്ന് യുഡിഎഫ് സ്ഥാനാർഥി പ്രിയങ്ക ഗാന്ധി. ഏറനാട് നിയോജക മണ്ഡലത്തിലെ അകമ്പാടത്ത് നടന്ന കോർണർ യോഗത്തിൽ സംസാരിക്കുകയായിരുന്നു അവർ.
നിത്യജീവിതം മുന്നോട്ടു കൊണ്ടുപോകാൻ സാധാരണക്കാരായ ജനങ്ങൾ ബുദ്ധിമുട്ടുകയാണെന്നും. അധികാരത്തിൽ നിലനിൽക്കുന്നതിന് വേണ്ടി ജനങ്ങളെ ഭിന്നിപ്പിക്കുന്ന രാഷ്ട്രീയമാണ് ഇപ്പോൾ കണ്ടുവരുന്നതെന്നും പ്രിയങ്ക പറഞ്ഞു . വിലക്കയറ്റം മൂലം സമൂഹത്തിലെ സർവ മനുഷ്യരും ബുദ്ധിമുട്ടുന്നു. മെച്ചപ്പെട്ട വിദ്യാഭ്യാസ, ആരോഗ്യ സംവിധാനങ്ങളടക്കം അടിസ്ഥാനപരമായ വികസനം ജനങ്ങൾക്ക് ലഭ്യമാക്കേണ്ടതുണ്ട്. കൂടുതൽ ഉന്നത വിദ്യാഭ്യാസ സ്ഥാപനങ്ങൾ ഇവിടെ വേണമെന്നും അവർ ആവശ്യപ്പെട്ടു. സാമൂഹിക സുരക്ഷ പെൻഷൻ ലഭിക്കാൻ കാലതാമസം നേരിടുകയാണ്. രാജ്യത്തെ പാവപ്പെട്ട ജനങ്ങൾക്ക് ആശ്വാസമായിരുന്ന തൊഴിലുറപ്പ് പദ്ധതി വിഹിതം കേന്ദ്രസർക്കാർ വെട്ടിക്കുറച്ചു. ഇവിടത്തെ പൂർവപിതാക്കന്മാർ രാജ്യത്തിൻ്റെ സ്വാതന്ത്ര്യത്തിനു വേണ്ടി പോരാടിയവരാണ്. കർഷകരുടെ വിളകൾക്ക് ന്യായമായ വില ലഭിക്കുന്നില്ല. വിളകൾ ഇൻഷുറൻസ് ചെയ്തിട്ടും കൃത്യമായ നഷ്ടപരിഹാരം ലഭിക്കുന്നില്ല. ഇതുമൂലം കർഷകർ വായ്പയെടുക്കാൻ നിർബന്ധിതമാകുന്നു. ഞാൻ കഴിഞ്ഞ ദിവസം സന്ദർശിച്ച കർഷകന് എട്ട് ലക്ഷം രൂപയുടെ കടമാണുള്ളത്. എന്നാൽ സർക്കാരിൽ നിന്ന് ഇവർക്ക് ഒരു സഹായവും ലഭിക്കുന്നില്ലെന്നും പ്രിയങ്ക ഗാന്ധി കുറ്റപ്പെടുത്തി.
ആത്മീയ ടൂറിസം, എക്കോ ടൂറിസം തുടങ്ങി ടൂറിസം മേഖലയ്ക്ക് ഇവിടെ ഒരുപാട് സാധ്യതകളാണുള്ളത്. ചെറുപ്പക്കാരിയായ സ്ത്രീ നടത്തുന്ന ഹോംസ്റ്റേയിൽ ഞാൻ കഴിഞ്ഞ ദിവസം പോയിരുന്നു. എന്നാൽ കഴിഞ്ഞ മൂന്നുമാസമായി ഹോംസ്റ്റേയിൽ താമസിക്കാൻ ആരും വരുന്നില്ല. ഇങ്ങനെ നിരവധി പ്രതിസന്ധികളിലായിരിക്കുന്ന നിങ്ങളെ പിന്തുണയ്ക്കാൻ എന്താണ് മോദി സർക്കാർ ചെയ്യുന്നതെന്ന് പ്രിയങ്ക ചോദിച്ചു . ഇവിടെ ഒരുപാട് കഴിവുള്ള ഫുട്ബോൾ കളിക്കാരുണ്ട്. അവർക്ക് മികച്ച സ്റ്റേഡിയങ്ങളും ഗ്രൗണ്ടുകളും പരിശീലനങ്ങളും ക്യാമ്പുകളും ഒരുക്കണം. ഇപ്പോൾ അധികാരത്തിലിരിക്കുന്ന സർക്കാറിന് സാധാരണ മനുഷ്യരുടെ അടിസ്ഥാന പ്രശ്നങ്ങൾ പരിഹരിക്കാൻ പോലും താൽപര്യമില്ല. മെച്ചപ്പെട്ട ആരോഗ്യ, വിദ്യാഭ്യാസ സംവിധാനങ്ങൾ ലഭ്യമല്ലാത്ത ആദിവാസി സമൂഹങ്ങൾ ഇന്നും വയനാട്ടിലുണ്ടെന്നും അവർ പറഞ്ഞു.
എ.ഐ.സി.സി. ജനറൽ സെക്രട്ടറിമാരായ കെ.സി. വേണുഗോപാൽ, ദീപാ ദാസ് മുൻഷി, കേന്ദ്ര തെരഞ്ഞെടുപ്പ് കമ്മിറ്റി ജനറൽ കൺവീനർ എ.പി. അനിൽകുമാർ എം.എൽ.എ, ഡി.സി.സി പ്രസിഡൻ്റ് വി.എസ്. ജോയ്, എം.എൽ.എമാരായ മാണി സി. കാപ്പൻ, സി.ആർ മഹേഷ്‌, കെ.എസ് ശബരീനാഥൻ, ഗഫൂർ കുറുമാടൻ, അഡ്വ. കെ.കെ അബ്ദുള്ളകുട്ടി, പി.പി സഫറുള്ള, ടി.പി അഷ്‌റഫലി, അജീഷ് എടാലത്ത്, കല്ലട കുഞ്ഞുമുഹമ്മദ്, അഡ്വ. യൂനുസ് സലിം, ഹൈദരാലി നാലകത്ത്, തോണിയിൽ സുരേഷ്, എം.കെ ഹാരിസ് ബാബു, ഹാരിസ് അട്ടീരി, കെ, ബെന്നി, മുരളി മുടവണ്ണ, അനീസ് അഗസ്റ്റിൻ, ബീന ജോസഫ്, കെ. സെമിയ, ഗീത ദേവദാസ് പങ്കെടുത്തു. ജ്യോതി വിജയകുമാർ പ്രിയങ്ക ഗാന്ധിയുടെ പ്രഭാഷണം പരിഭാഷപ്പെടുത്തി.