ഗൂഗിൾ മാപ്പ് നോക്കി യാത്ര; കാസർഗോഡിൽ കാർ യാത്രക്കാർ ഒഴുക്കിൽപെട്ടു

കാസർഗോഡ്: ഗൂഗിൾ മാപ്പ് നോക്കി യാത്ര ചെയ്ത കാർ യാത്രക്കാർ ഒഴുക്കിൽപെട്ടു. കാസർഗോഡ് കുറ്റിക്കോലിയിൽ ഇന്ന് രാവിലെ ആറ് മണിയോടെയായിരുന്നു അപകടം. പാലത്തിന്റെ നിരപ്പിൽ വെള്ളമുണ്ടായിരുന്നതിനാലും പാലത്തിന് കൈവരി ഇല്ലാത്തതിനാലുമാണ് കാർ പുഴയിലേക്ക് വീഴാൻ കാരണം. കാറിൽ ഉണ്ടായിരുന്ന റാഷിദ്, തസ്രീഫ് എന്നിവരെ ഫയർഫോഴ്‌സ് രക്ഷപ്പെടുത്തി. കാഞ്ഞങ്ങാട് നിന്ന് പുത്തൂരിലേക്ക് പോവുകയായിരുന്നു ഇവർ. ഗൂഗിൾ മാപ്പ് നോക്കിയായിരുന്നു യാത്ര.പുഴയിലേക്ക് മറിഞ്ഞ കാറിൽ നിന്നും പുറത്തിറങ്ങിയ ഇരുവരും ഒഴുക്കിൽപ്പെട്ടിരുന്നു. ഒരു മരത്തിൽ പിടിച്ച് നിൽക്കുകയായിരുന്ന ഇവരെ ഫയർ ഫോഴ്‌സ് സംഘമെത്തി രക്ഷപ്പെടുത്തുകയായിരുന്നു. സാരമായി പരുക്കേറ്റ യാത്രക്കാരെ ആശുപത്രിയിൽ പ്രവേശിപ്പിച്ചു.