ഛര്‍ദിയും വയറിളക്കവും; കാക്കനാട്ടെ ഫ്‌ളാറ്റിലെ 350 പേര്‍ ചികിത്സയില്‍

കൊച്ചി: കാക്കനാട്ടെ ഫ്‌ളാറ്റിലെ താമസക്കാരായ 350 പേര്‍ ഛര്‍ദിയും വയറിളക്കവുമായി ചികിത്സയില്‍. ഡി.എല്‍.എഫ് ഫ്‌ളാറ്റിലെ താമസക്കാര്‍ക്കാണ് അസുഖമുണ്ടായത്. കഴിഞ്ഞ ആഴ്ചകളിലായാണ് ഇത്രയേറെ പേര്‍ ചികിത്സ തേടിയത്. അഞ്ച് വയസ്സില്‍ താഴെയുള്ള 25 കുട്ടികളും ചികിത്സയിലുണ്ട്. കുടിവെള്ളത്തില്‍ നിന്നാണ് രോഗം പടര്‍ന്നതെന്നാണ് സംശയം. ആരോഗ്യവകുപ്പ് ജലസാമ്പിളുകള്‍ ശേഖരിച്ചു.

15 ടവറുകളിലായി 1268 ഫ്ളാറ്റുകളാണ് ഡി.എല്‍.എഫ് സമുച്ചയത്തിലുള്ളത്. 5000ത്തിലധികം താമസക്കാരുമുണ്ട്. കുടിവെള്ളത്തില്‍ നിന്നാണ് രോഗബാധയെങ്കില്‍ കൂടുതല്‍ ആളുകള്‍ ചികിത്സ തേടാനാണ് സാധ്യത. കിണര്‍, കുഴല്‍ക്കിണര്‍, മുനിസിപ്പാലിറ്റി ലൈന്‍ എന്നിവിടങ്ങളില്‍ വഴിയാണ് ഫ്ളാറ്റിലേക്ക് കുടിവെള്ളമെത്തിക്കുന്നത്. ഇവിടെ നിന്നുള്ള ബന്ധം വിച്ഛേദിച്ച് ടാങ്കറുകളില്‍ നിന്ന് വെള്ളമെത്തിക്കാനാരംഭിച്ചിട്ടുണ്ട്. ക്ലോറിനേഷന്‍ ഉള്‍പ്പടെയുള്ള നടപടികളിലേക്കും കടക്കും.