കഞ്ചാവും എംഡിഎംഎയുമായി പിടിയിലായവരില്‍ സിനിമ-ബിഗ്ബോസ് താരവും
പെരുമ്പാവൂർ: കഞ്ചാവും എംഡിഎംഎയുമായി പിടിയിലായവരില്‍ സിനിമ-ബിഗ്ബോസ് താരം പരീക്കുട്ടിയും. മൂലമറ്റം എക്സൈസ് റേഞ്ച് ഉദ്യോഗസ്ഥർ നടത്തിയ വാഹനപരിശോധനയിലാണ് നടൻ എറണാകുളം കുന്നത്തുനാട് വെങ്ങോല പള്ളിക്കൂടത്തിങ്കല്‍ പരീക്കുട്ടി (പി.എസ്.ഫരീദുദീൻ-31), കോഴിക്കോട് വടകര കാവിലുംപാറ കൊയിലോംചാല്‍ പെരിമാലില്‍ ജിസ്മോൻ (34) എന്നിവർ പിടിയിലായത്. പരീക്കുട്ടി പെരുമ്ബാവൂർ' എന്ന പേരിലാണ് നടനും ഗായകനുമായ പരീക്കുട്ടി സാമൂഹികമാധ്യമങ്ങളില്‍ അറിയപ്പെടുന്നത്. ടിക് ടോകില്‍ പാട്ടുകള്‍ പാടിയാണ് പരീക്കുട്ടി ശ്രദ്ധനേടിയത്. പിന്നീട് ഒമർലുലുവിന്റെ 'ഹാപ്പി വെഡ്ഡിങ്' എന്ന സിനിമയില്‍ ശ്രദ്ധിക്കപ്പെടുന്ന കഥാപാത്രത്തെ അവതരിപ്പിച്ചു. സിനിമ ഹിറ്റായതോടെ പരീക്കുട്ടി മുത്തലിബ് എന്ന കഥാപാത്രവും പ്രേക്ഷകമനസ്സുകളില്‍ ഇടംനേടി. ഒമർലുലുവിന്റെ തന്നെ മറ്റൊരു ചിത്രമായ 'അഡാർ ലൗ'വിലും പരീക്കുട്ടി അഭിനയിച്ചിട്ടുണ്ട്. 'പട്ടിക്കാട് ഫിറോസ്' എന്ന കഥാപാത്രത്തെയാണ് ഈ സിനിമയില്‍ പരീക്കുട്ടി അവതരിപ്പിച്ചത്. മലയാളം റിയാലിറ്റി ഷോയായ 'ബിഗ് ബോസി'ലെ മത്സരാർഥിയായിരുന്നു. ഗാനമേളകളിലും സജീവമായിരുന്നു.
മൂലമറ്റം എക്സൈസ് ഇൻസ്പെക്ടർ കെ.അഭിലാഷ്, അസി.എക്സൈസ് ഇൻസ്പെക്ടർ സാവിച്ചൻ മാത്യു, അനുരാജ്, വി.ആർ.രാജേഷ്, എ.ഐ.സുബൈർ, ചാള്‍സ് എഡ്വിൻ, എൻ.ടി.ബിന്ദു എന്നിവർ ചേർന്നാണ് പ്രതികളെ പിടികൂടിയത്.