പാലക്കാട് ദേശീയപാതയില്‍ സ്വകാര്യ ബസ് ലോറിയുമായി കൂട്ടിയിടിച്ച് അപകടം
പാലക്കാട്: തൃശൂര്‍-പാലക്കാട് ദേശീയപാതയില്‍ ചിതലിയില്‍ സ്വകാര്യ ബസ് ലോറിയുമായി കൂട്ടിയിടിച്ച് അപകടം. ഇടിയെതുടര്‍ന്ന് ലോറി തലകീഴായി മറിഞ്ഞു. തമിഴ്നാട്ടില്‍ നിന്ന് എറണാകുളത്തേക്ക് പോകുകയായിരുന്നു ലോറി. ബംഗളൂരുവില്‍ നിന്നും വരികയായിരുന്നു സ്വകാര്യബസ്. അപകടത്തില്‍ ആര്‍ക്കും പരിക്കില്ല എന്നാണ് വിവരം. പുലര്‍ച്ചെ നാല് മണിയോടെയാണ് സംഭവമുണ്ടായത്. യഥാര്‍ത്ഥ അപകട കാരണം വ്യക്തമല്ല. സ്വകാര്യബസിന്റെ മുന്‍വശത്തെ ചില്ല് തകര്‍ന്നിട്ടുണ്ട്.
ദിവസങ്ങള്‍ക്ക് മുന്‍പ് പാലക്കാട് ചെമ്മണാംപതി-മുതലമട റോഡിലും ട്രക്ക് അപകടം ഉണ്ടായിരുന്നു. ഇടുക്ക്പാറ കുണ്ടന്‍ തോടിന് സമീപം കാറും പിക്കപ്പും കൂട്ടിയിടിച്ചായിരുന്നു അപകടം. ഉച്ചയ്ക്ക് ശേഷം 3 മണിയോടെ മുച്ചംകുണ്ട് തെങ്ങിന്‍ തോപ്പില്‍ കള്ളെടുക്കാനായി പോകുന്ന പിക്കപ്പ് വാനും മുച്ചംകുണ്ട് ഫൈവ്സ്റ്റാര്‍ ക്വാറിയില്‍ നിന്നും വന്ന കിയ കാറുമാണ് കൂട്ടിയിടിച്ചത്. വെള്ളിനേഴി തിരിവാഴിയൂര്‍ സ്വദേശി സമേഷാണ് പിക്കപ്പ് വാന്‍ ഓടിച്ചത്. ഫൈവ് സ്റ്റാര്‍ ക്വാറി ജീവനക്കാരനായിരുന്ന സജിത്ത് മേനോനാണ് കാറിലുണ്ടായിരുന്നത്. ഇരുവരും നിസാര പരിക്കുകളോടെ രക്ഷപ്പെട്ടു. കാര്‍ പൂര്‍ണമായും പിക്കപ്പ് വാന്‍ ഭാഗികമായും തകര്‍ന്നു. ഇടിയുടെ ആഘാതത്തില്‍ പിക്കപ്പിന്റെ ടയറുകള്‍ ഊരി തെറിച്ചു. കൊല്ലങ്കോട് പൊലീസ് സ്ഥലം സന്ദര്‍ശിച്ച് കേസെടുത്തു