കുമരകത്ത് ശക്തമായ കാറ്റില്‍ ഓട്ടോറിക്ഷ പാടത്തേക്ക് മറിഞ്ഞു

കോട്ടയം: കുമരകത്ത് കനത്ത കാറ്റില്‍പെട്ട് ഓട്ടോറിക്ഷ പാടത്തേക്ക് മറിഞ്ഞു. കുമരകം റോഡില്‍ രണ്ടാം കലുങ്കിനു സമീപമാണ് അപകടം. കാറ്റില്‍ ബൈക്കുകളും റോഡില്‍ വീണു. പാടത്തേക്ക് മറിഞ്ഞ ഓട്ടോയിലെ യാത്രക്കാര്‍ പരിക്കേല്‍ക്കാതെ രക്ഷപ്പെട്ടു. ഇന്നലെ വൈകീട്ടുണ്ടായ കാറ്റിന്റെ വിഡിയോ ദൃശ്യങ്ങള്‍ പുറത്തുവന്നു.

സംസ്ഥാനത്ത് വിവിധ ജില്ലകളില്‍ ശക്തമായ മഴ തുടരുകയാണ്. വിവിധയിടങ്ങളില്‍ കനത്ത നാശമുണ്ടായി. മഴക്ക് പുറമേ ശക്തമായ കടല്‍ക്ഷോഭവുമുണ്ട്. വയനാട്, കണ്ണൂര്‍ ജില്ലകളില്‍ ഓറഞ്ച് അലര്‍ട്ട് പ്രഖ്യാപിച്ചിരിക്കുകയാണ്. കോട്ടയം, ആലപ്പുഴ, എറണാകുളം, പത്തനംതിട്ട, വയനാട്, ഇടുക്കി എന്നീ ആറ് ജില്ലകളില്‍ ഇന്ന് വിദ്യാഭ്യാസ സ്ഥാപനങ്ങള്‍ക്ക് അവധിയാണ്. മൂന്ന് ദിവസം കൂടി ശക്തമായ മഴ തുടരാനാണ് സാധ്യത.