ആത്മബന്ധം കൈമുതലാക്കി ബെന്നിബഹനാൻ
എം.പി എന്ന നിലയിൽ മണ്ഡലത്തിലെ മുക്കും മൂലയും ഹൃദിസ്‌ഥമാക്കിയ യുഡിഎഫ് സ്‌ഥാനാർഥി ബെന്നി ബഹനാൻ മണ്ഡലത്തിലെ ജനങ്ങളുമായുള്ള ആത്മബന്ധം കൈമുതലാക്കിയാണ് ഓരോ ദിവസവും പ്രചാരണത്തിൽ മുന്നേറുന്നത്. പാറക്കടവ്, കറുകുറ്റി, മൂക്കന്നൂർ എന്നിവിടങ്ങൾ കേന്ദ്രീകരിച്ചായിരുന്നു ഇന്നലെ ബെന്നി ബഹനാന്റെ പ്രചാരണം. വിവിധ മഠങ്ങൾ സന്ദർശിച്ചും അദ്ദേഹം അനുഗ്രഹം തേടി. പ്രധാന വ്യക്തികളെ നേരിൽ കണ്ടും സ്‌ഥാപനങ്ങളിൽ എത്തി പിന്തുണ അഭ്യർഥിച്ചുമായിരുന്നു അദ്ദേഹത്തിന്റെ പ്രചാരണം. കുറുമശേരി ലിറ്റിൽ ഫ്‌ളവർ അക്കാദമിയിൽ കുട്ടികളുമായി സ്നേഹസംവാദം നടത്തിയും മൂഴിക്കുളം നാലമ്പലത്തിലെത്തി അനുഗ്രഹം തേടിയും പ്രചാരണം തുടങ്ങിയ ബെന്നിബഹനാൻ കറുകുറ്റി പഞ്ചായത്തിലെ പാലിശേരിയിലെ ആകാശപ്പറവകൾ എന്ന സ്‌ഥാപനം സന്ദർശിച്ച് അന്തേവാസികളുടെ അനുഗ്രഹം തേടി.ഇവിടത്തെ ഭിന്നശേഷിക്കാരായ അന്തേവാസികളുമൊത് അദ്ദേഹം ഏറെ സമയം ചെലവഴിച്ചു. വൈകിട്ട് അങ്കമാലിയിൽ നടന്ന യുഡിഎഫ് ചാലക്കുടി ലോക്‌സഭാ മണ്ഡലത്തിലെ കേന്ദ്ര തെരഞ്ഞെടുപ്പ് കമ്മിറ്റി യോഗത്തിലും ഇഫ്താർ സംഗമത്തിലും ബെന്നി ബഹനാൻ പങ്കെടുത്തു.