ആംബുലൻസിൽ പൂരപ്പറമ്പിലെത്തിയ സംഭവത്തിൽ സുരേഷ് ഗോപിക്കെതിരെ പരാതി
തൃശൂർ: പൂരം കലക്കൽ വിവാദം ശക്തമാകുന്നതിനിടെ പൂരപ്പറമ്പിൽ ആംബുലൻസിലെത്തിയതിന് സുരേഷ് ഗോപിക്കെതിരെ പരാതി. സേവാഭാരതിയുടെ ആംബുലസിൽ സുരേഷ് ഗോപി എത്തുന്നതിന്റെ ദൃശ്യങ്ങൾ പുറത്തുവന്നതിന് പിന്നാലെ അനാവശ്യ കാര്യങ്ങൾക്ക് ആംബുലൻസ് ഉപയോഗിച്ചുവെന്ന് ചൂണ്ടിക്കാട്ടി അഭിഭാഷകനായ കെ സന്തോഷ് കുമാറാണ് പരാതി നൽകിയിരിക്കുന്നത്.
മറ്റ് വാഹനങ്ങൾക്ക് പ്രവേശനമില്ലാത്ത സ്ഥലത്താണ് ആംബുലൻസിൽ സുരേഷ് ഗോപിയെത്തിയത്. ഇതിന് പിന്നിലെ ഗൂഢാലോചന പുറത്തുകൊണ്ടുവരണമെന്നാവശ്യപ്പെട്ട് എൽഡിഎഫ് സ്ഥാനാർത്ഥിയായിരുന്ന വി എസ് സുനിൽ കുമാർ രംഗത്തെത്തിയിരുന്നു.
ആർഎസ്എസ് ബന്ധമുള്ള വരാഹി ഏജൻസിയുടെ കോർഡിനേറ്റർ അഭിജിത് നായരാണ് സുരേഷ് ഗോപിയെ പൂരപ്പറമ്പിലെത്തിച്ചത്‌. പൂരപ്പറമ്പിലെ ഇടപെടൽ ആസൂത്രണം ചെയ്തത് വരാഹി അനലറ്റിക്സാണെന്നാണ് ഉയരുന്ന ആരോപണം.വരാഹിക്ക് വേണ്ടിയാണ് ആർഎസ്എസ് നേതാവ് ജയകുമാർ എം ആർ അജിത് കുമാറിനെ കണ്ടതെന്നും ആരോപണമുണ്ട്.