എംവി ഗോവിന്ദന്റെ വാദം പൊളിയുന്നു; ബോംബ് നിർമാണത്തിനിടെ കൊല്ലപ്പെട്ടയാളുടെ വീട് സന്ദർശിച്ച് സിപിഎം നേതാക്കൾ
കണ്ണൂര്‍: പാനൂരിൽ ബോംബ് നിർമാണത്തിനിടെ സ്‌ഫോടനത്തില്‍ കൊല്ലപ്പെട്ട ഷെറിലിന്റെ വീട് സന്ദര്‍ശിച്ച് സിപിഐഎം നേതാക്കള്‍. കൊല്ലപ്പെട്ട ഷെറിലിന് പാർട്ടിയുമായി ബന്ധമില്ലെന്ന സിപിഎം സംസ്ഥാന സെക്രട്ടറി സെക്രട്ടറി എം വി ഗോവിന്ദന്റെ കഴിഞ്ഞ ദിവസത്തെ വാദമാണ് ഇതോടെ പൊളിഞ്ഞത്. സിപിഐഎം പാനൂര്‍ ഏരിയാകമ്മിറ്റി അംഗം സുധീര്‍ കുമാറും പൊയിലൂര്‍ ലോക്കല്‍ കമ്മിറ്റി അംഗം എ അശോകനും ഷെറിലിന്റെ വീട് സന്ദര്‍ശിച്ചത്. ഇതിന്റെ ദൃശ്യങ്ങളും പുറത്തായിട്ടുണ്ട്.
അതേസമയം ബോംബ് നിർമാണത്തിനിടെ കൊല്ലപ്പെട്ട ഷെറിലിന്റെവീട് സിപിഎം നേതാക്കൾ സന്ദർശിച്ചതിനെ കുറിച്ച് അറിയില്ലെന്നായിരുന്നു എം വി ഗോവിന്ദന്‍ മാധ്യമപ്രവര്‍ത്തകരുടെ ചോദ്യത്തിന് മറുപടിയായി പറഞ്ഞത്. സംഭവത്തിന് പാര്‍ട്ടിയുമായി യാതൊരു ബന്ധവുമില്ല. പാര്‍ട്ടി സഖാക്കളെ തന്നെ ആക്രമിച്ച കേസിലെ പ്രതികളാണെന്നും എം വി ഗോവിന്ദന്‍ പ്രതികരിച്ചു.