പൊലീസിനു സ്വാതന്ത്ര്യം, 110ാം ദിവസം ഫൈനൽ വിധി

കൊച്ചി: ആലുവ പീഡന കേസിൽ അന്വേഷണവും വിചാരണയും റെക്കോഡ് വേ​ഗത്തിലാണ് പൂർത്തിയാക്കിയത്. കേരളത്തിൽ ഏറ്റവും വേ​ഗത്തിൽ നടപടിക്രമങ്ങൾ പൂർത്തിയാക്കി പ്രതിക്കു വധ ശിക്ഷ നേടിക്കൊടുത്ത അപൂർവം കേസുകളിൽ ഒന്നാണിത്. സംഭവം നടന്ന് 30 ദിവസങ്ങൾക്കുള്ളിൽ അന്വേഷണം പൂർത്തിയായി കുറ്റപത്രം സമർപ്പിക്കപ്പെട്ടു. 60 ദിവസങ്ങൾക്കുള്ളിൽ വിചാരണയും പൂർത്തിയാക്കി. നടപടിക്രമങ്ങളെല്ലാം പൂർത്തിയാക്കി 110ാം ദിവസം അന്തിമ വിധിയും വന്നു.
ഈ നേട്ടത്തിനു പിന്നിൽ പൊലീസിനെയും ജുഡീഷ്യറിയെയും സ്വതന്ത്രമായി പ്രവർത്തിക്കാൻ അനുവദിച്ചതാണ് പ്രധാന കാരണം. സ്വതന്ത്രമായി പ്രവർത്തിക്കാൻ അനുവദിച്ചാൽ ഏതു കേസും ഇതു പോലെ കാര്യക്ഷമമായി തെളിയിക്കാൻ പൊലീസിനു കഴിയുമെന്ന് അന്വേഷണത്തിനു നേതൃത്വം നൽകിയ ഉദ്യോ​ഗസ്ഥർ പറയുന്നു. പ്രതി ഇതര സംസ്ഥാനത്തു നിന്നു വന്നയാളായതും അയാൾക്കു മേൽ ഭരണപക്ഷ താത്പര്യങ്ങൾ ഇല്ലാതെ പോയതുമാണ് പൊലീസിനു നിഷ്പക്ഷമായി പ്രവർത്തിക്കാൻ കഴിഞ്ഞത്.
അതേ സമയം, കേരളത്തെ നടുക്കിയ വാളയാർ ഇരട്ട ആത്മഹത്യാ കേസിൽ പൊലീസിനും കോടതിക്കും ഈ സ്വതാന്ത്ര്യം ലഭിച്ചില്ല. പോക്സോ കേസ് ആയിട്ടു പോലും അന്വേഷണം നീളുകയാണ്. പൊലീസിനു മേൽ കേരളത്തിലെ ഭരണ നേതൃത്വം നടത്തുന്ന ഇട‌പെടലുകളാണ് അന്വേഷണം അട്ടിമറിക്കുന്നതും പ്രതികളെ രക്ഷപ്പെടുത്തുന്നതും. ആലുവ സംഭവത്തിൽ അന്വേഷണം അട്ടിമറിക്കപ്പെടാതിരിക്കാനും പ്രതിയെ വളരെ വേ​ഗത്തിൽ കണ്ടെത്താനും ആലുവ എംഎൽഎ അൻവർ സാദത്തിന്റെ നേതൃത്വത്തിൽ നാട്ടുകാർ കാണിച്ച ജാ​ഗ്രത ഏറെ പ്രകീർത്തിക്കപ്പെട്ടു. അൻവർ സാദത്തിനെ പൊലീസ് ഉദ്യോ​ഗസ്ഥർ ഇന്ന് അനുമോദിക്കുകയും ചെയ്തു.