കോണ്‍ഗ്രസിന്റെ മരവിപ്പിച്ച ബാങ്ക് അക്കൗണ്ടുകള്‍ പുനഃസ്ഥാപിച്ചു

ഡല്‍ഹി: കോണ്‍ഗ്രസിന്റെ മരവിപ്പിച്ച ബാങ്ക് അക്കൗണ്ടുകള്‍ ആദായ നികുതി വകുപ്പ് അപ്പലേറ്റ് ട്രൈബ്യൂല്‍(ഐ.ടി.എ.ടി) പുനഃസ്ഥാപിച്ചു. അക്കൗണ്ടുകള്‍ മരവിപ്പിച്ചതായി സൂചിപ്പിച്ച് കോണ്‍ഗ്രസ് ട്രഷറര്‍ വാര്‍ത്താസമ്മേളനം നടത്തി മിനിറ്റുകള്‍ക്ക് ശേഷമാണ് ഐ.ടി.എ.ടിയുടെ നടപടി.

പൊതുതെരഞ്ഞെടുപ്പ് തീയതി പ്രഖ്യാപിക്കുന്നതിന് ആഴ്ചകള്‍ ബാക്കിനില്‍ക്കെ കേന്ദ്രസര്‍ക്കാര്‍ നടത്തിയ ഈ നീക്കം ജനാധിപത്യ പ്രക്രിയക്ക് നേരെയുള്ള പ്രഹരമാണെന്ന് കോണ്‍ഗ്രസ് അഭിപ്രായപ്പെട്ടു. 210 കോടി രൂപ നികുതി അടക്കണമെന്നാവശ്യപ്പെട്ടാണ് ആദായനികുതി വകുപ്പ് അക്കൗണ്ടുകള്‍ മരവിപ്പിച്ചതെന്നാണ് റിപ്പോര്‍ട്ട്. ഇത് രാഷ്ട്രീയ പ്രേരിതമാണെന്നും പാര്‍ട്ടിയുടെ തെരഞ്ഞെടുപ്പ് ഒരുക്കം തടസ്സപ്പെടുത്താന്‍ ആസൂത്രിതമായ ശ്രമമാണെന്നും കോണ്‍ഗ്രസ് ആരോപിച്ചു.

'ഇവിടെ ജനാധിപത്യം നിലവിലില്ല. ഏകപാര്‍ട്ടി ഭരണം പോലെ പ്രധാന പ്രതിപക്ഷ പാര്‍ട്ടിയെ സര്‍ക്കാര്‍ കീഴ്‌പെടുത്തിയിരിക്കുന്നു. ജുഡീഷ്യറിയോടും മാധ്യമങ്ങളോടും ജനങ്ങളോടും ഞങ്ങള്‍ നീതി തേടുന്നു' -മാക്കന്‍ പറഞ്ഞു.