ദൈവത്തിന്റെ കരസ്പർശം; വൈറലായി കണ്ടക്ടര്‍ ബിലു

ഓടുന്ന ബസില്‍ നിന്ന് തെറിച്ചുവീഴാന്‍ തുടങ്ങിയ യാത്രക്കാരനെ അത്ഭുതകരമായി കണ്ടക്ടര്‍ രക്ഷപ്പെടുത്തുന്ന വീഡിയോ വൈറലാകുന്നു. വീഡിയോ കണ്ടവർ ഒന്നടങ്കം പറയുന്നു 'ഇത് ദൈവത്തിന്റെ കൈ തന്നെ'.

പന്തളം- ചവറ റൂട്ടില്‍ ഓടുന്ന ബസില്‍ കാറാളിമുക്കില്‍ വച്ചാണ് സംഭവം. ബസിന്റെ പിന്നിലെ ഡോറിന് അരികില്‍ നിന്ന യാത്രക്കാരനെയാണ് കണ്ടക്ടർ ബിലു അത്ഭുതകരമായി രക്ഷപ്പെടുത്തിയത്. കൊല്ലം മണ്‍റോതുരുത്ത് സ്വദേശിയാണ് കണ്ടക്ടറായ ബിലു.

സംഭവം ബിലു വിവരിക്കുന്നതിങ്ങനെയാണ്; യാത്രയ്ക്കിടെ നിയന്ത്രണംവിട്ട് ബസിന്റെ വാതിൽ ലോക്ക് തുറന്ന് പുറത്തേയ്ക്ക് വീഴാന്‍ പോയ യാത്രക്കാരനെയാണ് ബിലു അത്ഭുതകരമായി രക്ഷിച്ചത്. ടിക്കറ്റ് നല്‍കി ബാലന്‍സ് വാങ്ങുന്നതിനിടെയാണ് യാത്രക്കാരന് ബാലന്‍സ് നഷ്ടപ്പെട്ടത്. 'പെട്ടെന്ന് എനിക്ക് പിടിക്കാന്‍ കഴിഞ്ഞതല്ല. അന്നേരത്തെ റിയാക്ഷനില്‍ അങ്ങനെ തോന്നിപ്പോയതാണ്. യാത്രക്കാരന്‍ ടിക്കറ്റ് എടുത്ത ശേഷം ബാലന്‍സ് വാങ്ങാന്‍ നില്‍ക്കുമ്പോഴാണ് സംഭവം. ബാലന്‍സ് ഇനി എത്രയാണ് തരാനുള്ളത് എന്ന് ചോദിക്കാനിരിക്കേ, ഒരു വളവ് വന്നു. വളവില്‍ വച്ച്‌ യാത്രക്കാരന്‍ ബാലന്‍സ് തെറ്റി വീഴുകയായിരുന്നു. എനിക്ക് നോക്കാനുള്ള സമയം ഒന്നും കിട്ടിയില്ല. എന്നാല്‍ എനിക്ക് പെട്ടെന്ന് തോന്നിയ റിയാക്ഷനില്‍ കൈയില്‍ കയറി പിടിക്കുകയായിരുന്നു. യാത്രക്കാരന്റെ വലതുകൈ ആണ് എനിക്ക് ലഭിച്ചത്. നിരവധിപ്പേര്‍ വിളിച്ച്‌ അഭിനന്ദിച്ചു'