അണപൊട്ടി ആവേശം; ജനാരവത്തിലലിഞ്ഞ് രാഹുലും പ്രിയങ്കയും

സുല്‍ത്താന്‍ ബത്തേരി: ആവേശം കൊട്ടിക്കയറി ലോക്‌സഭ പ്രതിപക്ഷ രാഹുല്‍ ഗാന്ധിയുടെയും യു.ഡി.എഫ് സ്ഥാനാര്‍ഥി പ്രിയങ്ക ഗാന്ധിയുടെയും റോഡ് ഷോ. സുല്‍ത്താന്‍ ബത്തേരി അസംപ്ഷന്‍ ചര്‍ച്ചിന് മുന്‍പില്‍ നിന്നാരംഭിച്ച റോഡ് ഷോ ചുങ്കം ജങ്ഷനിലാണ് അവസാനിച്ചത്. ഒരു നോക്ക് കാണുവാനായി ചേര്‍ന്നണഞ്ഞ ആയിരങ്ങള്‍ക്കിടയിലേക്ക് രാഹുല്‍ പ്രിയങ്കയും കടന്നുവന്നപ്പോള്‍ ആവേശം അണപൊട്ടി.

കത്തുന്ന വേനല്‍ ചൂടിനെ അവഗണിച്ച് റോഡിലും റോഡരികിലും കെട്ടിടങ്ങള്‍ക്ക് മുകളിലുമായി കാത്തിരുന്ന ആയിരങ്ങളെ ഇരുവരും അഭിവാദ്യം ചെയ്തു. സ്ത്രീകളും കുട്ടികളും യുവതികളും യുവാക്കളും പ്രായമായവരും ഉള്‍പ്പെടെ വന്‍ ജനാവലിയായിരുന്നു സുല്‍ത്താന്‍ ബത്തേരിയിലേക്ക് ഒഴുകിയെത്തിയത്. നാടന്‍ കലാരൂപങ്ങളും വാദ്യമേളങ്ങളും റോഡ് ഷോയുടെ ആവേശം കൊടുമുടിയിലെത്തിച്ചു.